نەتەوەیێن یەکگرتی بدارڤەکرنا جوانەکی رۆژهلاتێ کوردستانێ شەرمەزار کر و بانگ ل دەستهلاتێن ئیرانێ کر، دەملدەست جەزایێ بدارڤەکرنێ راوەستینە.
پێلەکە نوو یا بدارڤەکرنا گرتیێن ئیرانی، د ناڤ وان دە زارۆک و گرتیێن ژ خوەپێشاندانێن سالا بۆری، کارڤەدانێن ناڤدەولەتی ل پشت خوە ئانین.
ئۆفیسا مافێن مرۆڤان یا نەتەوەیێن یەکگرتی بدارڤەکرنا جوانێ 22 سالی میلاد زوهرەڤەند شەرمەزار کر و بانگ ل کۆمارا ئیسلامی یا ئیرانێ کر کو ب بلەز بدارڤەکرنا وەلاتیان راوەستینە.
بەردەڤکا ئۆفیسا مافێن مرۆڤان یا نەتەوەیێن یەکگرتی لیز ترۆسەل بانگ ل ئیرانێ کر کو د چارچۆڤەیا یاسایێن ناڤدەولەتی دە، ب بەرپرسیاریێن خوە یێن ناڤدەولەتی تەڤبگەرە.
گۆت ژی، کەسێن کو ل ئیرانێ هاتنە بدارڤەکرن، د ناڤ وان دە میلاد زوهرەڤەند، کو د خوەپێشاندانێن سالا بۆری دە هاتبوون گرتن، ژ مافێن هەری بنگەهین یێن دادگەهکرنەکە دادمەند بێپار بوون.
جوانێ کوردێ رۆژهلاتێ کوردستانێ میلاد زوهرەڤەند کو پار د مەراسیما چلهیا ژینا ئەمینی دە هاتبوو گرتن، رۆژا پێنجشەما بۆری ل باژارێ هەمەدانێ هات بدارڤەکرن.
رێخستنا لێبۆرینا ناڤدەولەتی (ئامنێستی) دیار کر، میلاد زوهرەڤەند هەشتەمین گرتیێ خوەپێشاندانانە کو ژ ئالیێ دەستهلاردارێن ئیرانێ ڤە هاتیە بدارڤەکرن.
ئامنێستی تەکەز کر ژی، ئیران ب ئاوایەکی سیستەماتیک وەلاتیان پشتی دادگەهکرنێن نەدادپەروەرانە بدارڤە دکە و ڤێ جەزایێ وەکە ئاموورەک ژ بۆ تەپەسەرکرنا خەلکێ بکار تینە.
هەر د بەردەوامیا کارڤەدانان دە ژی، وەزارەتا دەرڤە یا کهنهدایێ پێلا بدارڤەکرنا وەلاتیێن ئیرانێ شەرمەزار کر و ژ حکوومەتا ئیرانێ خواست کو جەزایێ دارڤەکرنێ راوەستینە.
