ھێزێن رێژیما سووریێ جارەکە دن تاخێن کوردان ل حەلەبێ و کۆچبەرێن عەفرینێ یێن ل ھەرێما شەھبا یا ل باکورێ حەلەبێ خستنە بن دۆرپێچەکا توند و خەلکێ وان ھەرێمان رووبروویی کارەساتەکا مرۆڤی بوونە.
تاخێن شێخ مەقسوود و ئەشرەفیێ کو وەک تاخێن کوردان ل حەلەبێ تێن ناسکرن و ل ھەرێما شەھبایێ یا ل باکورێ حەلەبێ نە، بەر ب کارەسەتەکا مرۆڤی ڤە دچن. فرقەیا 4 یا ئارتێشا سووریێ ژ مەھا تەباخا 2022 ڤە خستیینە بن دۆرپێچێ، لێ د دەما داوی دە ئەڤ دۆرپێچ توند کریە و رێ نادە سۆتەمەنی و پێویستیێن سەرەکی دەرباسی وان ناڤچەیان ببن.
جیگەرێ سەرۆکێ رێڤەبەریا خوەسەر ل گوندەوارێ حەلەبێ جەمال رەشید بۆ مەدیایا خوەجھی گۆت، ژ بەر دۆرپێچا ھێزێن رێژیما سووریەیێ و قەدەغەکرنا دەرباسکرنا سۆتەمەنیێ و کەلووپەلێن سەرەکی بۆ تاخا شێخ مەقسوود، خەلکێ تاخێ رووبروویی کارەسەتەکا مرۆڤی بوونە.
رەشید گۆت: “نشتەجھێن دەڤەرێن وان ھەم راستی چەوساندنا ل رێبەندێن کۆنترۆلێ یێن ئەولەکاریێ تێن، ھەم باجەکا گران ل سەر دەرباسکرنا کەلووپەلان فەرز دکن، ھەم ژی رێ نادن گەلەک کەلووپەلێن سەرەکی دەرباسی تاخێ ببن.”
ل گۆری رەشید، د ئەنجاما دۆرپێچێ دە، سۆتەمەنی نەمایە و ھەموو خەباتێن خزمەتگوزاریێ ژی راوەستیانە، ھەفتەیەکە ژی ئەلەکتریک ل سەر ھەموو ھەرێما شەھبایێ ھاتیە برین.”
ھەروھا رەشید تەکەز کر ژی، زیانا ھەری گران گھشتیە کەرتا تەندروستیێ کو نھا نەخوەشخانە ب تەنێ پێشوازیا حالەتێن ھەوارچوونێ یێن بلەز دکن.
ھەرێما شەھبایێ د ناڤبەرا ھەرێما عەفرین و حەلەبێ دەیە و د دەستێ یەکینەیێن پاراستنا گەل (یەپەگێ) دەیە. ژ دەما داگیرکرنا عەفرینێ ژ ئالیێ ئارتێشا ترکیێ و گرۆپێن چەکدار یێن سەر ب وێ ڤە د ئادارا 2018 دە، دۆرا 150 ھەزار عەفرینی ل 5 کامپان و ل گوندێن وێ ھەرێمێ بجھ بوونە.
