پارتیا كاركه‌ران بیلانچۆیا مژدارێ یا شه‌رێ خوه بێ واته راگهاند و دیسا ژ ده‌ره‌و گۆتیه كو 124 له‌شكه‌ر د ڤێ مه‌هێ ده كوشتنه، هه‌موه‌خت ده‌ستكه‌فتیێن كو ژ بۆی گه‌لێ كورد د ڤێ مه‌هێ ده ب ده‌ستخستن راگهاندن ئه‌و ژی هنه‌ك: «له‌پك، چانته و كنجێن بارانێ و كێر و پاوه‌ر بانكن».
ده‌وله‌تا ترك و په‌كه‌كه ل داوییا هه‌ر مه‌هه‌كێ بیلانچۆیا زرارێن هه‌ڤ رادگهینن، هه‌ر یێك دبێژه مه ئه‌وقاس كوشتنه، لێ هه‌ردو ئالی راست نابێژن و ڤێ وه‌كه شه‌ره‌كێ تایبه‌ت ل دژی هه‌ڤ دمه‌شینن و یێ كو زرارا راستین ئا ڤی شه‌رێ بێ واته دده، گه‌لێ باشوورێ كوردستانێ یه.
هه‌په‌گێ، رۆژا ئینی 1/12/2023 بیلانچۆیا مژدارێ ئاشكه‌ره كر و گۆت 124 له‌شكه‌رێن داگیركه‌ر كوشتنه 7 بالافرێن بێ مرۆڤ ئێخستنه. ل همبه‌ری ڤێ ته‌نێ 4 گه‌ریلا هاتنه كوشتن.
ل گۆری په‌كه‌كێ، د مژدارێ ده هه‌ر رۆژێ بێ ناڤبر 4 هه‌یا 5 له‌شكه‌ران هاتنه كوشتن!! هه‌گه‌ر ئه‌ڤ یێك راست به پێویسته كێفا هه‌ر كورده‌كی ژێ ره وه‌ره، لێ به‌لێ هه‌ر كو دچه په‌كه‌كه به‌رخوه‌دانا خوه ب ده‌ره‌وێن ووسا ب شاخ گه‌ش دكه و كوشتنا ت یێك ژ وان له‌شكه‌ران ل هۆلێ تونه.
پارتیا كاركه‌ران ژ سه‌رجه‌ما 124 له‌شكه‌رێن كو گۆتییه وێ كوشتنه، دیمه‌نێن ت یێك ژ وان ژی پارڤه نه‌كرنه و د نووچه‌یا راگهاندنا كوشتنا وان ده دیمه‌نێن هۆلیۆدی یێن چه‌كداره‌كی خوه یێ ل پشت تراشێ رازای پارڤه‌كریه.
