زارۆکەکی کورد، پێش دو سالان ژ ئالیێ ھێزێن سووریا دەمۆکراتیک هەسەدێ ڤە ھاتیە رەڤاندن، سال و مەھ دەرباس دبن، کەسووکار و مالباتا وی ب حەسرەتا دیتنا وی نە.
رێدوور شاھین، کورێ گوندێ تل خەزالێ یێ گوندەوارێ باژارێ کۆبانێ، یێ رۆژئاڤایێ کوردستانێ یە، ب مەبەستا لەشکەریا نەچار ھاتیە رەڤاندن.
عەزیز شاھین، بابێ ڤی زارۆکی، ل سەر رووپەلا خوە یا تۆرێن جڤاکی “فەیسبۆکێ” بانگا خوە نوو کر و خوەست چارەنڤیسا وی دیار ببە و وەھا گۆت: “2 سال ل سەر رەڤەندنا تە دا دەرباس دبن، ئەم نزانین تو ساخی یان مریی.”
ھەر وەھا گۆت: “رەڤادنا زارۆکان پیسترین تاوانا د دەرحەق زارۆکان دەیە، بلا رەڤینەرێن تە و ھەر زارۆکەکی دن ستووخوار و روورەش بن، ئەم ھاوارا خوە دکن کو ھەر کەسەک تشەکی ل سەر دزانە بلا پەیوەندیێ ب مە بکە”.
چیرۆکا رێدوور یەک ژ چیرۆک و سەرپێھاتیێن رۆژانە نە، کو ل دەڤەرێن رۆژئاڤایێ کوردستانێ یێن د بن دەستێ هەسەدێ دە و ل ھەر دو تاخێن شێخ مەقسوود و ئەشرەفیێ و کامپێن کۆچبەرکریێن عەفرینێ، روو ددن، کو ئەو یەک ژی بەرەڤاژی ناڤەرۆکا رێکەفتنا مەزلووم کۆبانێ فەرماندارێ هەسەدێ ل گەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان یا سالا 2019 ئیمزە کری تێ، ل گۆری وێ رێکەفتنێ دڤێت زارۆک نەیێن لەشکەرکرن و رەڤاندن، و زارۆکێن ژێر 18 سالی د ناڤا وێ ھێزێ دە بهێن بەردان.
