ل رۆژھلاتێ کوردستانێ 5 کۆلبەر ب گولـلەیێن ھێزێن ئەولەھیا ئیرانێ بریندار بوون و ئەو گەھاندن نەخوەشخانەیێ.
پێنج کۆلبەرێن ب ناڤێن رێبوار خەلکێ باژارێ بانە، ئاروین رەشیدپوور کۆلبەرێ خەلکێ باژارێ سەقز و 3 کۆلبەرێن خەلکێ باژارێ پاوە، کو ناسنامەیا یەک ژ وان ناڤێ وی کەیھان ئەمینییە ب گولـلەیێن راستەراست یێن ھێزێن ئەولەھیا ئیرانێ ل سینۆرێ کوردستانێ بریندار بوون.
دوھ 2/12/2023 کۆلبەرەکی ب ناڤێ رێبوار و خەلکێ گوندێ کێلە یا سەر ب باژارێ بانە ل سینۆرێ ھەنگەژالە یا بانە و 3 کۆلبەرێن دن ژی کو خەلکێ گوندێ داریان یا سەر ب باژارێ پاوە ل سینۆرێ نەوسوودێ ب گولـلەیێن راستەراست یێن ھێزێن ئەولەھیا ئیرانێ بریندار بوون. ھەتا نھا ناسنامەیا یەک ژ وان کۆلبەرێن خەلکێ داریانێ ب ناڤێ کەیھان ئەمینی تەنێ ئاشکەرا بوویە، کو 300 پارچەیێن ساچمەیان ل بەدەنا وی کەتنە.
ل گۆر زانیاریان پشتی برینداربوونا وان 3 کۆلبەرێن خەلکێ باژارێ پاوە، ژ بەر برینا وان کوور و گرانە ژ بۆ نەخوەشخانەیا قودس یا وی باژاری ھاتنە ڤەگوھەستن. ھەروھا کۆلبەرەکی دن یێ خەلکێ باژارێ بانە یێ ب ناڤێ رێبوار ژی ژ بۆ نەخوەشخانەیا باژارێ تەورێزێ ھاتیە ڤەگوھەستن.
ھەروھا کۆلبەرێ ب ناڤێ ئاروین رەشیدپوورێ خەلکێ باژارێ سەقز یێ ل سینۆرێ گوندێ ساوجی یا سەر ب مەریوانێ ب گولـلەیێن راستەراست یێن ھێزێن ئەولەھیا ئیرانێ ژ لنگێ خوە ڤە بریندار بوویە و ژ بۆ چارەسەریێ ژ بۆ نەخواشخانەیا بووەلی یا باژارێ مەریوان ھاتیە ڤەگوھەستن.
