ترکیە کاروانەکی سەربازی دشینە گرێ سپی

ئارتێشا ترکیەیێ کاروانەکی سەربازی دشینە گرێ سپی و بنگەھەکە سەربازی یا نوو چێ دکە.

مەدیایێن ناڤخوەیی یێن سووریەیێ پارڤە کریە، شەڤا بۆری، 4 بەرچلەیا 2023، ئارتێشا ترکیەیێ کاروانەکی سەربازی کو ژ 35 ئاموور و کەرەستەیێن سەربازی و زریپۆش و تانکان پێک ھاتیە شاند گرێ سپی ل باکورێ رەقەیێ.

ھەروەسا ئاماژە دایە کو، ئەو کاروان ل خالا سەربازی یا ترکیەیێ ل گوندێ خابوورا ل باشوورێ رۆژھلاتێ گرێ سپی ھاتیە بنەجھکرن.

پێشتر ژی رەوانگەھا سووریەیی یا مافێن مرۆڤان پارڤە کربوو کو، ترکیەیێ دەست ب چێکرنا بنگەھەکە سەربازی یا نوو ل باکورێ رەقەیێ کریە، لەوما بەردەوام کاروانێن نوو یێن سەربازی و ئاموورێن جودا جودا ژ بۆ وێ دەڤەرێ تێن شاندن.

گرێ سپی گرێدایی پارێزگەھا رەقەیێ یا سووریەیێ یە کو دکەڤە سەر سنۆرێ ترکیەیێ. د شەرێ ناڤخوەیی یێ سووریەیێ دە، باژار ل دەستپێکێ ل سالا 2012 کەفت بن دەستێ ئارتێشا سووریەیێ یا ئازاد، پاشی ل سالا 2014 ژ ئالیێ ھێزێن داعشێ ڤە ھات داگیرکرن و پاشی ل 16 خزیرانا 2016 ژی ژ ئالیێ ھێزێن سووریەیا دەمۆکرات (ھەسەدێ) ڤە ھات ئازادکرن. ل 13 جۆتمەھا 2019، گرێ سپی ژ ئالیێ ترکیەیێ و ھێزێن چەکدار ئێن نێزی ترکیەیێ ڤە ھات داگیرکرن.