کەسایەتیێ نەتەوپەروەر یێ رۆژئاڤا کوردستانێ زەکەریا مستەفا کۆچا داوی کر

کەسایەتیێ نەتەوەپەروەر و ئەندامێ پارتیا دەمۆکراتا کوردستان– سووریێ (پەدەکە-سە) ژ ھەرێما عەفرینێ زەکەریا مستەفا کۆچا داویێ کر.

کەسایەتیێ نەتەوەپەروەر و ئەندامێ جڤاتا ھەرێمێ یا پارتیا دەمۆکراتا کوردستان – سووریەیێ زەکەریا مستەفا دوھ 2023/12/4ێ، د 83 سالیا خوە دە کۆچا داویێ کر.

زەکەریا مستەفا سالا 1940 ژ داییک بوویە. ل سالا 1958 واتە سالەکێ پشتی دامەزراندنا پارتیا دەمۆکراتا کوردستان – سووریەیێ، د 17 سالیا خوە دە تەڤلی وێ پارتیێ ببوو و یەک ژ ئەندامێن چالاک بوو.

ھەرواھا زێدەتری 60 سالان د ناڤ تەڤگەرا ئازادیخوازا کوردی دە خزمەتا گەل و دۆزا کوردی کر.

زەکەریا مستەفا سالا 1972 ژ بۆ جارا یەکەم بوو ئەندامێ کۆمیتەیا ناڤەندی یا پەدەکەسێ ل سووریێ.

ژ بەر کار و خەباتا خوە، زەکەریا مستەفا ژ ئالیێ رژێما سووریێ ڤە راستی گەلەک ئاستەنگیان ھاتبوو و دەزگەھێن ئەولەھیێ یێن رژێمێ ھەرتم ل دوو وی بوون.

ئیرۆ رۆژا سێشەمبێ، 2023/12/5ێ، ب ئامادەبوونا ھەژمارەکا مەزن ژ سیاسەتڤان و رەوشەنبیر و کەسایەتیێن عەفرینێ، تەرمێ زەکەریا مستەفا دێ ل گۆرستانا گوندێ ماراتێ بێ ڤەشارتن.