دەستهلاتا دادوەری یا تەهرانێ راگهاند، پشتی 600 رۆژ ژ بنچاڤکرنێ، دادگەهکرنا دیپلۆماتەکی سوێدی یێ کو د یەکیتیا ئەورۆپایێ دە کار دکر، دوهی یەکشەمێ ب تۆمەتا «کۆمپلۆکرنا ب ئیسرائیلێ رە ژ بۆ گهاندنا زیانێ ب کۆمارا ئیسلامی یا ئیرانێ» دەست پێ کر.
ئاژانسا نووچەیانا «میزان» یا سەر ب دەستهلاتا دادوەری یا ئیرانێ ڤە راگهاند، ژۆهان فلۆدرۆس ب کریارێن ل «دژی ئەولەهیا نەتەوەیی، ئالیکاریا ئیستخباراتا ئیسرائیلێ و گەندەلیا ل سەر روویێ ئەردێ» تێ تۆمەتبارکرن.
ل گۆری ئاژانسا «فرانس-پرێس»، تۆمەتا «گەندەلا ل سەر روویێ ئەردێ»، یەک ژ تاوانێن هەری گران یێن ل ئیرانێ یە کو دبە جەزایێ بداڤەکرنێ لێ وەرە برین.
ئاژانسا «میزان» ژ سەر زارێ دۆزگەریێ راگهاند: «تاوانبار د وارێ کۆمکرنا زانیاریان ژ بۆ بەرژەوەندیا رەژیما سیۆنیست د چارچۆڤەیا پرۆژەیێن تێکدانێ دە ل دژی کۆمارا ئیسلامی یا ئیرانێ چالاکە».
وەزیرێ دەرڤە یێ سوێدێ تۆباس بڵسترۆم د داخویانیەکێ دە گۆت: «ئەز هاتمە ئاگاهدارکرن کو دادگەهکرنا ژۆهان فلۆدەرۆس رۆژا یەکشەمێ ل تەهرانێ دەست پێ کریە».
ژۆهان فلۆدەروسێ 33 سالی یێ سوێدی کو د بەشا دیپلۆماسی یا یەکیتیا ئەورۆپایێ دە کار دکر، پشتی کو د 17ێ نیسانا 2022ان دە ژ بەتلانەیێ ڤەدگەریا، ل فرۆکخانەیا تەهرانێ هات بنچاڤکرن و نها ل گرتیگەها ئێڤین یا تەهرانێ تێ راگرتن.
بڵسترۆم گۆت: «ت بنگەهەک نینە کو ژۆهانن فلۆدرۆس د گرتیگەهێ دە بمینە. هەروها بڵسترۆم دا زانین، سوێد و یەکیتیا ئەورۆپایێ ئەڤ یەک ژ نوونەرێن ئیرانێ رە ئاشکەرە کرنە.
ژ ئالیێ خوە ڤە، سەرۆکێ کاروبارێن دەرڤە یێن یەکیتیا ئەورۆپی جۆزێف بۆڕەڵ بانگا بەردانا فلۆدرۆس کر و گۆت کو ئەو «بێسووچه» و ت سەدەمەک تونەیە کو ئەو د گرتیگەهێ دە بمینە.
