ھلبژارتنێن شارەداریێن ترکیەیێ ل ئادارا سالا بێ دێ هێن کرن، چاڤدێرەکێ سیاسی ژی دبێژە، “پیدڤیە کاندیدێن کوردان خوەدیێن نەرینێن کورد و کوردستانی بن و زمانێ کوردی بزانن”.
چاڤدێرێ سیاسی یێ دیاربەکرێ ئیبراھیم راگەھاند، “ئەڤ ھلبژارتن ژ بۆ کوردان گرنگن، چ ل کوردستانێ چ ژی ل تەڤاھیا ترکیەیێ، ژ بەر کو برێڤەبرنا شارەداریێ راستەراست برێڤەبرنا باژار و باژارۆکان و دەڤەرێیە”.
ھەروەسا تەکەز کر، “ل باژارێن کوردستانێ، دڤێت کورد شارەداریێن خوە ھل ببژێرن”.
ئیبراھیم گوچلو ئاماژە دا وێ یەکێ، “بەلکی دەرفەت ھەیە کورد بکارن ل باژارێن بچووک سەرۆکێن شارەداریان و پارەکە مەزن یا ئەندامێن جڤاتان قازانج بکن”. ھەروەسا گۆت، “لێ قازانجکرنا باژارێن مەزن ژ ئالیێ کوردان ڤە ممکن نینە”.
وی چاڤدێرێ سیاسی بال کشاند سەر تایبەتمەندیێن کاندیدان و گۆت، “کاندیدێن باژارێن کوردستانێ، ژ چ پارتیێ بن فەرق ناکە، پیدڤیە خوەدیێن نەرینێن کورد و کوردستانی بن، کوردی بزانن و کوردستانێ و باژارێن کوردستانێ ناس بکن”.
ھەروەسا تەکەز کر، “ژ بۆ کو باژاران ب رێ ڤە ببن، دڤێت کوردی بزانن و بکارن لگەل خەلکی ب کوردی دانووستاندنان بکن”.
