پشتی کو ھات راگھاندن رێیا نوویا کو دێ ل ئامەدێ بێ چێکرن دێ ناڤێ شێخ سەعید لێ بکن، رۆژنامەگەر فاتیح ئالتایلی بەرتەک نیشان دا و سڤکاتی ل شێخ سەعید کر. سەندیکایا ئامەدێ ژی راگھاند کو ژ بەر گۆتنێن فاتیح ئالتایلی یێن سڤکاتیێ ئەو دێ ل دژێ وی دۆزەکی ڤەکن.
پشتی قەیووم ل شارەداریا باژارێ مەزن یێ ئامەدێ دانای کو رێیا نوویا کو دێ هێت چێکرن دێ ناڤێ بولڤارا شێخ سەعید ل سەر هێت دانان، ژ ئالیێ رێخستنا تەکەپێ یا ئامەدێ و گەلەک جھان بەرتەک ھات نیشاندان. یەک ژ بەرتەکان ژ رۆژنامەگەر فاتیح ئالتایل ھات. ئالتایلی د بەرنامەیا خوە دە سڤکاتی ل شێخ سەعید کر.
ئالتایلی د ئاخافتنا خوە دە ئەڤ گۆتن ب کار ئانین:
“حکوومەتا مە یا ب ناڤێ خوەجھی و نەتەوەیی ھەیە. ناڤێ چ جادەیەکی ب ناڤێ کەسەکی رەزیل، کو ل دژی ترکیێ لگەل ئینگلیزان ھەڤکاری کری و دەما کو ترکیە ھین د قۆناغا دامەزراندنێ دە بوو سەری ھلدا و ھەول دا ڤی وەلاتی ھلوەشینە و پارچە بکە، ناهێتە کرن. ب ناڤێ سەرھلدانا شێخ سەعید سەرھلدانەک ھەیە. ئیجار ھوونێ سبە ناڤێ جادەیەکی کن جادەیا ئۆجالان ژی؟
سەرۆکێ سەندیکایا ئامەدێ: ئەم دێ سەرلێدانا تاوانەکی بکن
سەرۆکێ سەندیکایا ئامەدێ ناھید ئەرەن ل سەر حەسابا خوە یا مەدیایا جڤاکی داخویانی دا و دیار کر کو ئەو ل ھەمبەری سڤکاتیکرنا ئالتایلی بێدەنگ نامینن.
ئەرەن گۆت، “ئەم ل ھەمبەری ئێریشا قرێژا ل ھەمبەری شێخ سەعید بێدەنگ نامینن. ئەڤ زیھنیەتا کو خوە تەکانە خوەدیێ وەلات دبینە، ژ رەوشا کو ئەم تێ دە نە بەرپرسیارە. سەندیکایا ئامەدێ دێ گلیێن پێویستێن سووج بکە. ئێریشکرنا نرخێن کوردان نە ئەوقاس ھێسانە.”
