ئەحمەد بەرەکات وەک سەکرەتەرێ نوو یێ “پێشڤەروو” هات دەستنیشانکرن

پارتیا دەمۆکراتا پێشڤەروویا کورد ل سووریێ، پشتی پارچەبوونا د ناڤا پارتیێ دە، ئەحمەد بەرەکات وەکە سەکرەتەرێ خوەیێ نوو دەستنیشان کر.

پارتیا دەمۆکراتا پێشڤەروویا کورد ل سووریێ کو کۆنگرەیا خوەیا 16 د ناڤبەرا 8 – 12 بەرچلە ل باژارێ عاموودێ گرێ دا، دوھی کۆمیتەیا ناڤەندی یا کو د کۆنگرەیێ دە ھاتیە ھلبژارتن جڤیا.

د داخویانیەکێ دە ژی دیار کر، ئەندامێن کۆمیتا ناڤەندی کو پەرەنسیپا ھلبژارتنێ ژ بۆ دەستنیشانکرنا سەکرەتەرێ نوو دیار کر، لێ ئەحمەد سلێمان خوە ڤەکشاند، ئەحمەد بەرەکەت ژی وەک سەکرەتەرێ نوو ھات دەستنیشانکرن.

د داخویانیێ دە ھات گۆتن، د ھەمان جڤینێ دە مەکانیزمایێن دامەزراندنا ئۆفیس و سازیێن پارتیێ، ل گۆری گوھەرتن و پێشھاتێن نوو ھاتن گۆتووبێژکرن.

پشتی کۆچا داویێ یا سەکرەتەرێ بەرێ یێ پارتیا پێشڤەروو عەبدولحەمید دەرویش د 24 جۆتمەھا 2019 دە، ژ بەر ناکۆکیێن د ناڤ رەفێن پارتیێ دە، کۆنگرەیا پارتیێ چەند جاران ھاتبوو پاشخستن.

د 20 جۆتمەھا 2023 دە ژی، سەلاح دەرویش کو برایێ عەبدولحەمید دەرویشە، سەرپەرەشتیا کۆنگرەیەکێ ل قامشلۆ کر و تێ دە گۆت کو ئەو نوونەرتیا پارتیا پێشڤەروو دکە و ئەو وەک سەکرەتەرێ نوو ھاتیە ھلبژارتن. لێ پرانیا ئەندامێن کۆمیتا ناڤەندییا پارتیا پێشڤەروو گۆتن کو “ئەو کۆنگرە نە رەوایە و نوونەرتیا پارتیا وان ناکە”.

ژ ئالیەکی دن ڤە، د داخویانیا داویێ یا کۆنگرەیا پێشڤەروو دە ھات گۆتن، دەستپێکرنا دیالۆگا سووری-سووری کو نوونەرێن پێکھاتەیێن نەتەوەیی و ئۆلی یێن گەلێ سووریێ تێ دە بەشدار ببن، “دبە کو ببە گاڤەک بەر ب دیتنا چارەسەریەکە سیاسی ژ بۆ ئالۆزیێ، ب ئیرادەیەکا سووری.”

ھەروھا د داخویانیێ دە ھات گۆتن ژی: “دۆزا کوردی بەشەکە ژ دۆزا گشتی یا نشتمانی یا سوورییێ، کو پێویستە د چارچۆڤەیا نشتمانی یا سووریەیێ دە وەرە چارەسەرکرن.”

پێشڤەروو تەکەز کر ژی: “ھەبوونا پێکھاتەیا کوردی، پێکھاتەیەکە دیرۆکی یا رەسەنە کو بەشەکە ژ گەلێ سووریەیێ و دویەمین نەتەوەیا ھەری مەزنە و مافێ وێ ھەیە کو گارانتیا دەستووری و مافێن خوە یێن نەتەوی یێن رەوا د چارچۆڤەیا دەولەتا سووریەیێ دە، وەربگرە.”