پارتیا سەعادەتێ و پارتیا پێشەرۆژێ بریار دانە کو ل دیاربەکرێ ب ھەڤرە بەشداری ھلبژارتنێن شارەداریان ببن. رێڤەبەرێن سەعادەت و پێشەرۆژێ ددن زانین کو دێ کاندیدەکێ وان کەسەک کوردیزان و ناڤەک خورت بە.
یەک ژ تفاقێن ھلبژارتنێن شارەداریان یا 31 ئادارا 2024 ژی تفاقا پارتیا سەعادەتێ و پارتیا پێشەرۆژێ یە کو ژ ئالیێ ھەردو پارتیان ڤە کۆمسیۆنا ھەڤکاریێ یا ھلبژارتنێ ھاتیە ئاڤاکرن و کاندیدێن تفاقێ ژی دێ ژ ئالیێ ڤێ کۆمیسیۆنێ ڤە هێن دیارکرن. پارتیێن کو تفاقا خوە راگھاندنە دێ ل دیاربەکر ژی کاندیدەک ھەڤپار نیشان بدن و ددن زانین کو دێ کاندیدێ وان کوردیزان بە و ل گۆری داخواز و ھێڤیێن گەل بە.
سەرۆکێ شاخا دیاربەکرێ یێ پارتیا پێشەرۆژێ ئایدن ئالتاچ گۆت: “ل دیاربەکرێ و ل تەڤاھیا ھەرێما کو کورد لێ دژین دڤێت یێن سیاسەتێ دکن کوردی بزانبن کورمانجی یان ژی زازاکی بزانبن. ھەڤدیتنێن مە بەردەوامن. ئەم دێ ل گۆری داخوازێن گەل کاندیدان نیشان بدن.”
خەباتێن پارتیا سەعادەتێ و پارتیا پێشەرۆژێ بۆ دیارکرنا کندیدێن ھەڤپار بەردەوامن و رێڤەبەرێن ڤان ھەردو پارتیان ددن زانین کو بۆ بەرفرەھکرنا تفاقێ دێ سەردانا پارتیێن دن ژی بکن و ھەر وھا ل دژی تەعیینکرنا قەیومان ژی ھەلوەستا خوە ئاشکەرە دکن.
جیگرێ سەرۆکێ شاخا دیاربەکرێ یێ پارتیا سەعادەتێ حەمید ئۆزان دبێژە: “ئەم ل دژی پەرگالا قەیومانە. ھەڤدیتنێن مە ل گەل پارتیێن وەک دەم پارتی و ھاکپارێ ھەبوون و ژ بۆ ھلبژارتنێن شارەداریان ژی ئەم دێ سەردانا وان بکن.”
پارتیا سەعادەتێ د ھلبژاتنێن 2019 دە ل دیاربەکرێ شارەداریا چونگوشێ ب دەست خستبوو و ژ بەر کو پۆتانسیەلا وێ ھەیە دێ پارتیا پێشەرۆژ ژی ب لۆگۆیا سەعادەتێ بکەڤە ھلبژارتنێ لێ ھەتا دەما داوی ژی دەریێن خوە بۆ تفاقەک نو ڤەکری دھێلن.
