چه‌كدارێن په‌كه‌كێ و ملیشیایێن وێ یێن ل شه‌نگالێ، حه‌مله‌یێن مه‌زن یێن ترساندن و ده‌سته‌سه‌ر كرنا ده‌نگدێرێن په‌ده‌كێ ده‌ستپێكرنه، ب رییا پێوه‌ندیێن تێله‌فوونی ژی گه‌فان ل گه‌لێ شه‌نگالێ و ناڤچه‌یێن وێ د خوه و ژ وان ره دبێژه: «ژ به‌ر كو وه ده‌نگ ب په‌ده‌كێ دا یه، ئه‌مێ تۆلا خوه ژ وه هلینن».
پاش كو پارێزگه‌ها نه‌ینه‌وایێ ژ گرووپێن ته‌رۆریستی یێن مینا قاعیده و داعشێ رزگاربووی، گه‌لێ مووسلێ و ده‌شتا نه‌ینه‌وایێ ئیسال د سه‌قایه‌كێ ئارام و هێمن ده ده‌نگێ خوه د هلبژارتنێن مه‌جلیسێن گشتی یێن پارێزگه‌هێن ئیراقێ ده دان، لێبه‌لێ ل شه‌نگالێ ره‌وش به‌ره‌ڤاژی بوو، رێخستنێن په‌كه‌كێ یێن ل ور حه‌مله‌یێن به‌رفه‌ره‌هـ یێن ترساندن، ده‌سته‌سه‌ر كرنێ ده‌ستپێكرن و گه‌ف ل ده‌نگدێرێن په‌ده‌كێ دخوارن كو ئه‌وێ تۆلێ ژ وان هلینن.
چاڤكانیێن «داركا مازی» یێن ل شه‌نگالێ ئاگاهیێن هه‌ری تایبه‌ت ده‌ربارێ ڤێ هه‌ولا قرێژ یا په‌كه‌كێ ده‌ست خستن، ئه‌مێ ب به‌لگه و ناڤ و نیشان بخن به‌ر چاڤان:
ل رۆژا پێش هلبژارتنێ ئانكو ل 17/12/2023ێ ئه‌ندامه‌كی ئاساییشا په‌كه‌كێ ب ژمارا تێله‌فوونێ یا (07501710590) پێوه‌ندی ب ڤان كادرۆیێن په‌ده‌كێ كری یه:
عیدۆ قاسم حسێن / به‌رپرسێ هلبژارتنان ل سنوونێ و دوگورێ.
جندی ئێزدین ملحه‌م / كیان سیاسی سه‌ر ب لژنه‌یا سنوونێ.
ده‌خیل سمۆ / كیان سیاسی و به‌رپرسێ یێك ژ رێخستنێن په‌ده‌كێ.
وی ئه‌ندامێ ئاساییشا په‌كه‌كێ ژ وان ره گۆتی یه كو هه‌گه‌ر ئه‌و ل سه‌ر كارێ خوه یێ ب په‌ده‌كێ ره به‌رده‌وام بن، وێ وه‌رن ره‌ڤاندن و وه‌ندا كرن.
پشتره ل رۆژا هلبژارتنێ ئانكو ل 18/12/2023ێ ئه‌ندامه‌كی «ئاساییشا ئێزیدخانێ» كو ناڤێ وی نه‌هاتیه زانین هاتیه جه‌م كادرۆیێ په‌ده‌كێ یێ ب ناڤێ «سندی قه‌رۆ جیان» د ناڤا بنگه‌ها هلبژارتنێ ده ل سه‌نته‌رێ ناحیا سنوونێ و گه‌فا كوشتنێ و شه‌وتاندنێ ل وی خواریه و ژێ خوه‌ست كو بنگه‌هێ ده‌نگدایینێ ب جی بهێله.
ل هه‌مان رۆژێ 5 جوانێن ئێزدی ژ هێلا «ئاسایشا ئێزیدخانێ» ڤه هاتنه ده‌سته‌سه‌ر كرن ژ به‌ر كو وان جوانان بانگه‌شه ژ بۆی نامزه‌دێ خوه یێ په‌ده‌كه‌یی ل كۆمه‌لگه‌ها خانه‌سوورێ و ناحیا سنوونێ دكر، «ئاساییشا ئێزیدخانێ» ڤیدیۆیێن وان جوانان ل مه‌دیایا په‌كه‌كێ پارڤه‌كرنه و توهمه‌تێن بێ بنگه‌هـ و بێ به‌ختی ل وان كرنه.
ل رۆژا ده‌نگدایینێ ئانكو ل 18 كانوونێ، په‌كه‌كێ ب رییا چه‌ته‌یێن خوه یێن رێخستنێن «جوانێن شۆره‌شگه‌ر و ئاساییشا ئێزیدخانێ» ل هه‌رێمێن ژێر نفۆزا په‌ده‌كێ، وێنه‌یێن ده‌نگدێرێن په‌ده‌كێ دگرتن، ژ بۆ كو پشتره وه‌رن ترساندن و ئیشكه‌نجه دان، ڤێ هه‌ولا په‌كه‌كێ ترسه‌كه هه‌ری زێده د ناڤا گه‌لێ شه‌نگالێ ده چێكر و بوو یێك ژ سه‌ده‌مێن كێمبوونا رێژه‌یا ده‌نگدایینێ ل شه‌نگالێ و گرعزێر.
هه‌ر دوهـ رۆژا ده‌نگدایینێ ئه‌ندامه‌كی په‌كه‌كێ ب ژمارا تێله‌فوونێ یا (07856947357) گه‌ف ل ئالیگرێن په‌ده‌كێ یێن ب ناڤێن «مجدل مارو كوشتار و حه‌ردان قه‌یرانی» خوارنه و ژ وان ره گۆتیه: ژ به‌ر كو وه ده‌نگ ب په‌ده‌كێ داییه ئه‌مێ وه سزا بدن و نێزیكه وێ رۆژا وه وه‌ره.
هه‌موخت ئه‌ندامه‌كی هه‌والگیرییا په‌كه‌كێ ب ژمارا تێله‌فوونێ یا (07511810590) گه‌ف ل هه‌مولاتییێ ب ناڤێ «حسێن جه‌لال مراد» خواریه، ئه‌ڤ كه‌س كاری وی شۆفێره و هاتن و چووینێ ل نێڤبه‌را دهۆكێ و شه‌نگالێ دكه، ئه‌ندامێ هه‌والگیرییا په‌كه‌كێ ژێ ره گۆتیه كو هه‌گه‌ر ئه‌و كارتێن خوه یێن ده‌نگدایینێ ژ وان ره نه‌شینه و ده‌نگی ب نامزه‌دێ په‌كه‌كێ یێ ب ناڤێ «قاسم كه‌شكو» نه‌ده، ئه‌وێ نه‌هێلن جاره‌كه دن ئه‌و وه‌ره شه‌نگالێ، هه‌ر وها وێ وه‌ره ده‌سته‌سه‌ر كرن و وه‌ندا كرن.
ئه‌ندامێن هه‌والگیرییا په‌كه‌كێ هه‌ر وها ل رۆژا ده‌نگدایینێ گه‌فێن راسته راست ل شێنیێن گوندێن هێلا سینۆری یا ئیراق سووریێ كرنه كو ده‌نگی ب نامزه‌دێ په‌كه‌كێ «قاسم كه‌شكو» بدن، ژ بۆی ڤێ ژی ل رۆژا ده‌نگدایینێ په‌كه‌كێ كامیرایێن چاڤدێریێ ل ناڤا بنگه‌هێن ده‌نگدایینێ ڤه‌مراندنه و ئه‌ندامێن خوه خستنه د ناڤا بنگه‌هان ده ژ بۆ كو ب دارێ زۆر ده‌نگێ وان هه‌مولاتییان ژ بۆی نامزه‌دێ خوه قه‌ید بكن.
ل سینۆرێ ناحیا گرعزێر په‌كه‌كێ ل رۆژا ده‌نگدایینێ مه‌فره‌زه چێكرن و حه‌مله‌یێن ترساندنا هه‌مولاتییان مه‌شاندن و ژ خه‌لكێ ره دگۆتن هه‌ر یه‌كێ ده‌نگێ خوه بده په‌ده‌كێ وێ وه‌ره ده‌سته‌سه‌ر كرن و جه‌زا كرن، ئه‌ڤێ یه‌كێ باندۆره‌كه خه‌راب ل رێژه‌یا به‌شداربوونا هه‌مولاتییان د ده‌نگدایینێ ده كر كو رێژه‌یه‌كا هه‌ری زۆر ژ نه‌چاری نكارین بچن بنگه‌هێن ده‌نگدایینێ.
