سیاسەتمەدارا کورد لەیلا زانا د 2014 دە ژ بەر تێکلیێن گەرم یێن لگەل مەسعوود بارزانی و ژ بەر ھەلوەستا خوە یا سەربخوە، ژ ئالی رێڤەبرێن ھەدەپێ ڤە ھاتبوو رەخنەکرن و ئۆجالان ژی ب کوشتنێ زخت ل لەیلا زانا کربوو. د ھەڤدیتنێن ئیمرالیێ دە (2014)، (کو ب ناڤێ – تێبنیێن ئیمرالیێ- وەک پرتووک ژ ئالیێ وەشانخانەیا مەزۆپۆتامیایا پەکەکێ ڤە ھاتیە وەشاندن)، ژ بەر تێکلیا وێ یا لگەل مەسعوود بارزانی و ژ بەر سیاسەتا وێ یا نە ل گۆر میتێ، ھەدەپێ و ئۆجالان، ئۆجالان راستەراست لەیلا زانا ب مرنێ تەھدید دکە و دبێژە دڤێت ئەو دەرنەکەڤە دەرڤەیی سیاسەتا ھەدەپێ/پەکەکێ.
ئۆجالان ب رێیا سری سوورەیا ئۆندەر، پەرڤین بولدان و ئیدریس بالوکەن پەیامەکێ ژ لەیلا زانا رە دشینە و دبێژە “ژ لەیلایێ رە بێژن ھەڤدیتنا لگەل ئۆجالان جدییە. ھەتا بارزانی ژی مژارەک دنە. بێی ھەڤدیتنێن مە ئەو د پلەیا خوەیا نھا دە نابت. ئەم تەڤگەرەک سیاسی نە. ھەگەر ب سیاسەتێ بلیزە ئەو دێ ب جانێ خوە بەردێلێ بدە. ئەڤ نە لیزتکەکە. نە پێکانە کو ب شێورمەندێن خوە رە بێ با من. لێ گەر ب برێز سڕی رە بێ ئەم دکارن ھەڤ ببینن”.
وەک تێ زانین، پشتی گەف و تەھدیدا ئۆجالان، لەیلا زانا خوە ژ قادا سیاسەتێ ڤەکشاند و ل مالا خوە روونشت. کەسایەتیا وێ، ھەست و ھەلوەستێن وێ یێن کوردایەتی و تێکلیا وێ یا گەرما لگەل مەسعوود بارزانی ژ بۆ میتێ، پەکەکێ، ھەدەپێ و ئۆجالان خەتەرەک مەزن بوو و ل دژی سیاسەتا میتێ، پەکەکێ و ئۆجالان بوو. ژ بەر ڤێ، میتێ و ئۆجالان خوەستن وێ ژناڤ ببن و ژ سیاسەتێ دوور بخن.
پارتیا دەم دخوازە د ھلبژارتنێن ھەرێمی یێن 31 ئادارا 2024 دە ژ بۆ ھەڤسەرۆکاتیا شارەداریا باژارێ مەزن یا ئامەدێ سیاسەتمەدارا کورد لەیلا زانا وەک کاندید دەستنیشان بکە. ل گۆری کو د چاپەمەنیێ دە تێ گۆتن، رێڤەبرێن پارتیا دەمێ ژ بۆ شارەداریا باژارێ مەزن یا ئامەدێ و شارەداریا باژارێ مەزن یا ستەنبۆلێ پێشنیاز ب لەیلا زانا دانە و ل بەندا بریارا وێ نە.
کاندیدیا لەیلا زانا ھەلبەت وەک ھەر جارێ نە د دەستێ رێڤەبرێن پارتیا دەمێ دەیە. ناڤێن کاندیدان وەک لیستەیەکێ ژ بۆی ئیمرالیێ/ئۆجالان تێن شاندن، ل ور ب شێورمەندییا رێڤەبرێن میتێ تێن ھلبژارتن و پشترە وەک کاندید ئەشکەرە دبن.
بێگومان لەیلا زانا ژی ڤان تشتان باش دزانە و ھاتیە سەرێ وێ ژی.
ئیجار دێ کاندیدیا لەیلا زانا و بریارا ئۆجالان و رێڤەبرێن ئیمرالیێ ببە چ ھەلبەت دێ د رۆژێن پێش دە دەرکەڤە ھۆلێ.
رۆژەڤاکورد
