ئەنداما دەستەیا ھەڤسەرۆکاتیا پەیەدێ دەربارێ ئێریشێن شەڤا بۆری یێن ترکیەیێ ل سەر رۆژئاڤایێ کوردستانێ دە دبێژە، ئەو ئێریش یەکپارچەییا خاکا سووریێ دکە ئارمانج، لەوما دڤێت حکوومەتا سووریێ ل ھەمبەر ترکیەیێ ھەلوەستەکێ نیشان بدە.
ئارتێشا ترکیێ شەڤا بۆری وێستگەھا سەیدا و ئەودایێن پەترۆلێ ل تربەسپیێ و وێستگەھا پەترۆلێ یا گوندێ بانا شکەفتێ یا ل دێرکێ بۆمبەباران کر. د ئەنجامێ دە ئەو وێستگەھ ژ کار دەرکەتن و گەلەک گوند، باژارۆک بێ ئەلەکیتریک مان.
ئەنداما دەستەیا ھەڤسەرۆکاتیا پارتیا یەکیتیا دەمۆکراتیک (پەیەدێ) فۆزا یووسف دەربارێ ڤان ئێریشان دە راگھاند، ئێرشێن دەولەتا ترکیەیێ، قرکرنا ئابۆرییە و ئارمانجا وێ گوھەرتیا دەمۆگرافیک و کۆچبەرکرنە.
فۆزا یووسف گۆت ژی: “ئارمانجکرنا بنەسازیێ، تاوناکە شەری یە و بەشەکا سیاسەتا ئەردێ شەوتییە. ترکیە پیڤانێن ئەخلاقی یێن شەری بنپێ دکە، ئەڤ یەک ئیسبات دکە کو د ئالیێ لەشکەری و سیاسی دە تێک چوویە، ژ بەر وێ ئێرش بنەسازیێ دکە و ژیانا سڤیلان و ژێدەرێن ئەنەرژیێ دکە ئارمانج.”
گۆت ژی: “ئەڤ ئێرش ل دژی یەکتیا خاکا سووریەیێ یە. دڤێت حکومەتا شامێ ل ھەمبەری دەولەتا ترکیەیێ یا کو چاڤێ خوە بەردایە خاکا سووریەیێ، ھەلوەستا خوە زەلال بکە. بێدەنگیا حکومەتا شامێ تێ واتەیا رەواکرنا ئێرشان.”
ھەروھا ئەنداما دەستەیا ھەڤسەرۆکاتیا پەیەدێ گۆت کو ھەلوەستا ھێزێن ناڤدەولەتی شەرمۆکی نە و بانگ ل ھێزێن دەمۆکراتیک یێن ل جیھانێ کر کو ل دژی سیاسەتێن دەولەتا ترکیەیێ دەرکەڤن.
