رێخستنا “جوانێن شۆرەشگەر” یا سەر ب پەکەکێ ڤە ل باژارێ کۆبانێ کەچەکا تەمەن بچووک ب ئارمانجا چەکدارکرنا وێ د ناڤ رەفێن پارتیێ دە رەڤاندن.
ناڤێ کەچا کو هاتیە رەڤاندن ئەمەل قەھرەمان شێخ محەمەدە، مالباتا ڤی زارۆکێ راگھاند کو کەچا وان ژ ئالیێ رێخستنا “جوانێن شۆرەشگەر” ڤە ل باژارێ کۆبانێ ھاتیە رەڤاندن و چارەنڤیسا وێ ژ دەما رەڤاندنا وێ د دەستپێکا مژدارا 2023یێ دە ھەتا نھا نە دیارە.
مالباتا ئەمەلێ دیار کر کو کەچا وان یا 12 سالی ل باژارێ کۆبانێ لگەل باپیرێ خوە دژیا، ئەمەل خوەندکارا پۆلا هەشتێ بنەرەتی یە.
ل گۆر ئاگاهیان، ئەمەل لگەل ھەموو ئەندامێن مالباتا خوە، ل بەندێ بوون لگەل بابێ خوە بگھن ئالمانیایێ، بریار بوو کو مالبات بچە ھەولێرێ ژ بۆ سەرلێدانا کۆنسولخانەیا ئالمانیایێ، ژ بۆ تەمامکرنا کاخەزێن خوە یێن چوونا ئالمانیایێ.
مالباتێ دیار کر کو ھەر چەندە ل ناڤەندێن رێخستنا “جوانێن شۆرەشگەر” و ناڤەندێن رێڤەبەریا پارتیا یەکیتیا دەمۆکراتیک ل وێ گەریانە ژی، لێ بەلێ ھەموو ھەولدان ب سەر نەکەتن.
ئەمەل زارۆکا سێیەمین یا ڤێ مالباتێ یە و د 8ێ خزیرانا 2010 دە ل رەقایێ ژ داییک بوویە و ناڤێ داییکا وێ جیهان محەمەدە.
تێ زانین د 14ێ ڤێ مەهێ دە زارۆکەکی دن یێ 13 سالی ب ناڤێ ” فەیاز عیسا محەمەد” ژی ژ ئالیێ چەتەیێن ب ناڤێ “جوانێن شۆرەشگەر” ڤە کو راستەراست فەرمانا ژ قەندیلێ وەردگرن، هاتیە رەڤاندن و هەیا نها چارەنڤیسا وی ژی نەدیارە.
فەرماندارێ هەسەدێ مەزلووم کۆبانێ، د سالا 2019 دە ل گەل ڤێرجینیا گامبا نوونەرا نەتەوێن یەکگرتی بوو کارووبارێن زارۆکان، پەیمانەک ئیمزە کریە، کو ئێدی زارۆکان تەڤلی ھێزێن خوە نەکە و یێن د ناڤ دە سەربەست وەرن بەردان، لێ تا نھا چ پابەندی ب پەیمانێ نەھاتیە کرن، و رەڤاندن و لەشکەرکرنا زارۆکان بەردەوامن.
