ئارتێشا ترکیێ ئیرۆ ب رێیا درۆنان، هەژمارەک جهـ و سازیێن خزمەتکاریێ ل قامشلۆ و کۆبانێ بۆمبەباران کرن و هەژمارەک کەس بریندار بوون.
ژێدەرەکی ژ قامشلۆ ژ کوردستان 24 رە راگهاند، درۆنەکە ترکیێ ئیرۆ ئۆفیسا کۆمکرنا سۆتەمەنیێ یا «سادکۆپ» ل تاخا ئالایا، چاپخانەیا سیماڤ، کارگەها ئێمێ ئاژالان و دەردۆرا وەستگەها ترێنێ ل باژارێ قامیشلۆ کرن ئارمانج.
ل گۆری زانیاریێن دەستپێکێ، د ئەنجاما بۆمبەبارانا ل سەر چاپخانەیا سیماڤ دە، 3 وەلاتی بریندار بوونە.
هەر ئیرۆ دانێ سبێ ژی، درۆنێن ترکیێ کامپانیەکە و جهەکی تامیرکرنا ئۆتۆمۆبیلان ل ناڤا کۆبانی بۆمبەباران کرن، د ئەنجامێ دە 2 کارکەر بریندار بوون.
ئەڤ ئێریش د دەمەکێ دەیە، رۆژا 23ێ بەرچلە ژی، فرۆکەیێن ترکیەیێ وەستەگه‌ها پەترۆلێ یا سەعیدێ و زەڤیا ئەودایێ ل تربەسپیێ و ناڤەندا ئەلەکتریکێ یا گوندێ بانێ شکەفتێ ل دێرکێ بۆمبەباران کربوون.
د وێ دەربارێ دە، وەزارەتا بەرەڤانیێ یا ترکیێ بەلاڤ کربوو، فرۆکەیێن ترکیێ شەڤا 23ێ بەرچلە 29 چەپەرێن په‌كه‌كێ و یپگێ ل باشوور و رۆژئاڤایێ كوردستانێ بۆمبەباران کرن.
وەزارەتێ دابوو خویاکرن، ئەڤ ئێریش ژ بۆ تۆلهلدانا 12 لەشکەرێن وانە کو د دەما داوی دە د شەر و پەڤچوونێن ل گەل په‌كه‌كێ دە هاتبوون کوشتن.
