فەرماندەیێ گشتی یێ ھێزێن سووریەیا دەمۆکرات (ھەسەدێ) راگەھاند، ترکیە ژێرخانە و دەزگەھێن مەدەنی ل رۆژئاڤایێ کوردستانێ دکە ئارمانج، داخوازێ ژی ژ جڤاکا ناڤدەولەتی دکە کو مایتێکرنێ بکن و ئێریشێن ترکیێ راوەستینن.
فەرماندەیێ گشتی یێ ھێزێن سووریەیا دەمۆکرات (ھەسەدێ) مەزلووم عەبدی ل سەر تۆرا جڤاکییا “X”ێ نڤیسیە، “زێدەباری پابەندبوونا ل سەر داخوازکرنا ماف و سلامەتیێن گەلێ خوە، ئەم داخوازێ ژ جڤاکا ناڤدەولەتی دکن کو مایتێکرنێ بکن و ئێریشێن ترکیێ راوەستینن و سەقامگیریا دەڤەرێ بپارێزن”.
ھەروەسا راگەھاندیە، “بێدەنگیا جڤاکا ناڤدەولەتی و رێکخستنێن مافێن مرۆڤان ئاماژەیەکا نیگەرانکەرە”.
مەزلووم عەبدی تەکەز کریە، “ئەم حسابێ ژ بۆ لھەڤکرنا ب ھەڤپەیمانیا ناڤدەولەتی رە دکن ژ بۆ کو رەوش خرابتر نەبە و شەرەکێ مەزن روو نەدە”.
بەحسا وێ یەکێ ژی کریە کو، ئێریشێن ترکیێ وەرچەرخانەکا مەترسیدار پەیدا کریە، ھەروەسا ئارمانجکرنا ژێرخانە و دەزگەھێن سڤیل یێن رۆژئاڤایێ کوردستانێ بەرفرەھتر دکە”.
گۆتیە ژی، “ئەڤ پێشھات زرارەکا مەزن دگەھینن خەلکێ سڤیل و ئاماژەیەکە ژ بۆ سیاسەتەکا نوویا قرکرنێ”.
ئاماژە دایە وێ یەکێ ژی کو، ئەڤ ئێریش ترسێ زێدە دکن، ئەڤ یەک ژی سەقامگریێ تێک ددە و مەترسیێن بنپێکرنا سنۆران زێدە دکە.
مەزلووم عەبدی گۆتیە ژی، “ئەم داخوازێ ژ ترکیێ دکن کو بالا خوە بدە سەر پرسێن خوەیێن ناڤخوەیی و د ناڤ سنۆرێن خوە دە چارە بکە”.
گۆتنێن مەزلووم عەبدی پشتی وێ یەکێ ھاتن کو دۆھ (دوشەمبێ، 25 بەرچلەیا 2023) ئارتێشا ترکیەیێ ب رێیا درۆنان چەند جھێن ھەر دو باژارێن کۆبانی و قامشلۆیێ یێن رۆژئاڤایێ کوردستانێ بۆمبەباران کرن.
ل گۆر ئامارەکا نوویا رەوانگەھا سووریی یا مافێن مرۆڤان، ھەشت وەلاتیێن سڤیل د ئێریشێن ترکیەیێ دە ل باژارێ قامشلۆیێ ھاتنە کوشتن و زێدەتری 10 کەسان ژی بریندار بوونە.
