دەستەیا پەروەردە و فێرکرنێ یا رێڤەبەریا خوەسەر راگھاند، ژ بەر ئێریشێن ئارتێشا ترکیەیێ، ل 712 دبستانان پەروەردە راوەستیایە.
ھەڤسەرۆکا دەستەیا پەروەردە و فێرکرنێ سەمیرا حەج عەلی ئیرۆ ل باژارێ رەقایێ د داخویانیەکێ دە راگھاند، ئێرشێ ترکیەیێ باندۆرەک مەزن ل سەر پەروەردەیێ چێکریە و ب تایبەتی ل ھەرێمێن سینۆری.
دیار کر ژی، ل ھەرێمێن جزیر، کۆبانێ، عەفرین و شەھبایێ ل 712 دبستانان پەروەردە راوەستیایە و 89 ھەزار و 418 خوەندەکار ژ خوەندنێ بێپار مانە.
ئاماژە ب وێ ژی دا، ئارتێشا ترکیەیێ چاپخانەیا سیماڤ کو پرتووکێن دەرسان چاپ دکە بۆمبەباران کر و 5 خەباتکارێن وێ جانێ خوە ژدەست دان.
ئارتێشا ترکیەیێ ژ رۆژا 24 ڤێ مەھێ ڤە ب رێیا درۆنان ب دەھان سازی و ناڤەندێن خزمەتگوزاریێ و خالێن ئاسایش و ھەسەدێ ل ناڤچەیێن جودایێن رۆژئاڤایێ کوردستانێ بۆمبەباران کرنە.
ل گۆری ئاماران ژی ھەتا نھا 8 کەسان جانێ خوە ژدەست دانە، ھەژمارەک کەس بریندار بوونە و زیانێن مادی یێن مەزن دەرکەتنە.
