مەجلیسا پارتییا وەلاتپارێزێن کوردستانێ (PWK) دەربارێ ھلبژارتنێن شارەداریان دە دەستپێشخەریەکێ پێشکێش دکە و دبێژە: “وەرن د ھلبژارتنێن ھەرێمی یێن ئادارا 2024 دە، ئەم کاندیدێن خوە یێن ھەڤبەش ب ھەڤ رە تەسپیت بکن. وەرن ئەم باژارێن خوە ب ھەڤ رە ئیدارە بکن!
مەجلیسا PWK د داخویانیا خوە دە دبێژە: “ئەم دکارن ل باکورێ کوردستانێ، ل ھەموو پارێزگەھ، قەزا و بەلدەیان نامزەدێن سەرۆکێ شاراداران و نامزەدێن مەجلیسێن شارەداران، ب بەشدارییا پارتییێن سیاسی، رێخستنێن مەسلەکی، سەندیکا، دەزگەھێن سڤیل یێن جڤاکی و کەسایەتییێن د ناڤا جڤاتێ دە خوەدی روومەت و ب باندۆرن رە، ل ھەر باژار و قەزا و بەلدەیان جڤینان ئامادە بکن.”
داخویانیا مەجلیسا مەجلیسا پارتییا وەلاتپارێزێن کوردستانێ وھایە:
وەرن د ھلبژارتنێن ھەرێمی یێن ئادارا 2024 دە، ئەم کاندیدێن خوە یێن ھەڤبەش ب ھەڤ رە تەسپیت بکن. وەرن ئەم باژارێن خوە ب ھەڤ رە ئیدارە بکن!
د 31 ئادارا 2024 دە دێ ل باکورێ کوردستانێ و ترکییەیێ ھلبژارتنێن شارەدارییان پێک وەرن.
لگەل لبەرچاڤگرتنا ھەموو تەجرووبەیێن ھەتا نھا یێن د وارێ ھلبژارتنێن شارەدارییان دە، دڤێت ئەم ب ئاوایەکی نوو و نەخشەرێیەک تایبەتی، خوە ژ بۆ ھلبژارتنان ئامادە بکن.
ب ڤێ ئارمانجێ، ئەم دکارن ل باکورێ کوردستانێ، ل ھەموو پارێزگەھ، قەزا و بەلدەیان کاندیدێن سەرۆکێ شاراداران و کاندیدێن مەجلیسێن شارەداران، ب بەشدارییا پارتییێن سیاسی، رێخستنێن مەسلەکی، سەندیکا، دەزگەھێن سڤیلیێن جڤاکی و کەسایەتییێن د ناڤا جڤاتێ دە خوەدی روومەت و ب باندۆرن رە، ل ھەر باژار و قەزا و بەلدەیان جڤینان ئامادە بکن.
ل ھندەک ویلایەتێن ترکییەیێ ژی ب ھەمان ئارمانج و شێوەیی، ئەم دکارن پلاتفۆرمێن ھەڤبەش پێک بینن؛ کاندیدێن سەرۆکێ شارەداران و ئەنجوومەنان تەسپیت بکن یان پشتگرییا وان کاندیدێن دەمۆکرات بکن.
ژ بۆ تەسپیتکرنا نەخشەرێیەکە راستەقین و بەرھەمدار، دڤێت ئەم ژ نھا ڤە و بێ کو ئەم ب دەرەنگی بخن، ل ھەموو باژار، قەزا، بەلدەیێن باکورێ کوردستانێ کو دێ ھلبژارتن لێ چێ ببن، جڤینان پێک بینن.
ب ڤێ ئارمانجێ؛ وەکە گاڤا پێشی ئەم دکارن ژ دیاربەکرێ دەست پێ بکن. د ڤێ پارالەلێ دە، ل گۆری نەخشەرێیا کو بێ تەسپیت کرن ئەڤ دکارە ل ھەموو ویلایەتێن باکورێ کوردستانێ پێک وەرە. وەکە دەستپێک، ب بانگا “پلاتفۆرما پشتگری و پاراستنا شارستانی یا دییاربەکرێ” دکارە جڤینەکە بەرفەرھ بێ ئامادەکرن.
دڤێت ژ بۆ ڤێ جڤینێ، نوونەرێن پارتی، تەڤگەر و گرۆپێن سییاسی یێن ل دیاربەکرێ، ئەندامێن پلاتفۆرما پشتگری و پاراستنا شارستانیا دییاربەکرێ، ھەموو دەزگەھێن سڤیل و مەسلەکی، یێن جڤاکی و جەماوەری یێن دەرڤەیی پلاتفۆرما پشتگری و پاراستنا شارستانێ، کۆمەلەیێن مەحەلی، سەندیکا، کەسایەتێن جڤاکی یێن خوەدی باندۆر، نوونەرێن دەزگەھ و کۆمەلەیێن ژنان، سەرۆکێن بەرێ یێن شارەدارییان، ئەندامێن ئەنجوومەنێن ویلایەتان یێن خوەدی تەجرووبە، پەروەردەکار، ئاکادەمیسیەن، پسپۆرێن برەڤەبرنا شارستانییێ، پسپۆرێن پلان و ھاوردۆرا شارستانییێ، زانیارێن دیرۆکی، زانیارێن کولتور و زمان، حقووقناس، ئەکۆنۆمیست و سۆسیۆلۆگ، بێنە دەعوەت کرن.
د ڤێ جڤینا پێشی دە، ئەم ھەول بدن کو د وارێ ئاوایێ تەسپیتکرنا کاندیدێن ھەڤبەش دە، ھەڤبەشییەکێ پێک بینن. پشتی وێ، ژ بۆ تەسپیتکرنا تایبەتمەندییێن کاندیدان، چارچیڤەیا سیاسی یا ھەڤبەش و پرەنسیپێن برێڤەبرنێ، ئەم دکارن بریارێ بدن کو پشتی 7 رۆژان جڤینا دویەم ئامادە بکن.
د جڤینا دویەم دە؛ دڤێت ئەم ھەول بدن کو ژ بۆ تەسپیتکرنا تایبەتمەندییێن کاندیدان و پرەنسیپێن سییاسی و یێن برێڤەبرنا شارەدارییان دە چارچیڤەکێ ھەڤبەش پێک بینن.
د جڤینێن پشتی وێ دە، دڤێت ب ھەڤبەشی کاندیدێن بەربژێرێن سەرۆکێن شارەدارییان، کاندیدێن بەربژێرێن ئەنجوومەنێن ویلایەت و قەزایان بێنە تەسپیت کرن. کاندیدێن کو ژ ناڤ نامەزەدێن بەربژێران و ب ئاواکی ھەڤبەشی بێنە ھلبژارتن؛ دێ ل گۆری رەوشا ئەتنیکی، ئۆلی، مەزھەبی، جڤاکی و کولتوری و ب ئاواکی دەمۆکراتیک، ھەڤاھەنگی و رێزلێگرتنا ماف و ئازادیا ھەموو بەشێن جڤاتێ؛ شارەدارییەکە پرزمانی و راستەقینە ب رێ ڤە ببن.
دڤێت شارەداری ب ڤی ئاوایی، ب ڤێ بیرووباوەرییێ و ل سەر ڤی ئەساسی بێن برێڤەبرن:
د شارەدارییێن باژارێن باکورێ کوردستانێ دە، دڤێت شارەداری ناسنامەیا کوردی و زمانێ کوردی ب ئاواکی رەسمی قەبوول بکن. دڤێت ناڤێ باژار، ناڤچە و ھەموو جیھ و وارێن ب کوردی، ل گەل ناڤێن ب ترکی بێنە بکارئانین. دڤێت شارەدارییێن مە ب ئاواکی چالاک بخەبتن کو، پەروەردەیا ب زمانێ کوردی (کورمانجی و کردکی-زازاکی)، مافێن ئازادیا رامانی، ئۆلی، باوەری، خوەرێخستنکرن و خوە ئیفادەکرنێ د قانوونا ئەساسی دە بێ قەبوول کرن و ب قانوونێن پێوەندیدار بێ مسۆگەر کرن؛ جیھێ مەزەلێ شێخ سەعید، خالد بەگێ جبری، سەیید رزا، سەید نوورسی و ھەموو کەسایەتێن کورد یێن کو جیھێ مەزەلێ وان نە دییارن، ژ ئالییێ دەولەتا ترکییەیێ ڤە بێنە ئاشکەرە کرن. ئانکو د رێڤەبریا شارەدارییێن باژارێن کوردستانێ دە، دڤێت پرزمانی، پرکولتوری، پڕەنگی، پردەنگی، شەفافی، خوەشبینی و ھەڤاھەنگییا جڤاکی ببە رێزکنامەیا ئەساسی. ئەڤە دکارە ببە پرۆتۆکۆلا مە یا سیاسی یا ھەڤبەش دا کو ئەم بکاربن ب ئیرادەیا ھەموو پێکھاتەیێن کوردستانێ بنگەھێ ئیدارەکرنا باژارێن خوە ئاڤا بکن.
دڤێت کاندیدێن ھەڤبەش یێن سەرۆکاتییا شارەدارییێ ژ کەسێن ژ وی باژاری کو ژ ئالییێ جڤاتێ ڤە ناسکری، ژێ تێ حەز کرن، لایقی وێ وەزیفەیێ، گومان ل سەر تونەیە و ب ئاواکی شەفاف بێ تەسپیتکرن. سییاسەتا دەولەتا ترکییەیێ یا دامەزراندنا قەیوومان و دەستدانینا سەر ئیرادەیا خەلکێ ب چ ئاوایی نایێ قەبوول کرن؛ قەیووم تونە حەسباندنا ئیرادەیا گەلێ وی باژارییە. ھەلبەتە کو، مافێ ھەر پارتییێ یە کو بکاربە ب سەرێ خوە بەشداری ھلبژارتنان ببە. لێ ل گۆری مە، یا ھەری راست، پێکھاتەیێن ھەری بەرفرەھ یێن وی باژاری بکاربن ل سەر بەرنامەیەکە ھەڤبەش کاندیدێن خوە ب ھەڤ رە تەسبیت بکن. لێ ئاشکەرەیە کو، د تەسبیت کرنا نامزەدێن شارەوانییان دە، دڤێت چ کەس کاندیدێن نە ژ وی باژاری نە و رێزێ ل پر زمانی، پرۆلی، پرمەزھەبی، پر کولتورییا وی باژاری ناگرن ل سەر کەسی فەرز نەکن و دڤێت رێ ڤەکن کو ب ئاوایەکی ھەڤبەش، ئازاد و دەمۆکراتیک کاندید بێنە تەسبیت کرن.
پرۆگراما خەباتێ، پرەنسیبێن برەڤەبرییێ یا کاندیدێن ھەڤبەش و کادرێن برێڤەبر ژی ل گۆری وان تایبەتمەندی و کریتەرێن ل ژۆر ھاتنە دیار کرن و ب ئاواکی ھەڤبەش دڤێت بێنە تەسپیت کرن.
پشتی لھەڤھاتن و موتابقاتەکە ب ڤێ بیر و باوەرییێ، کاندیدێن ھەڤبەش دکارە ب ھەڤ رە بێ تەسپیت کرن. پارتییا وەلاتپارێزێن کوردستانێ (PWK) دێ ھوورگلییێن بیر و باوەری و پێشنیارێن خوەیێن د دەربارێ بەرنامە، پرەنسیپ و نەخشەرێیا، د شەردێن ھەیی دە برێڤەبرنا شارەدارییێن باکورێ کوردستانێ دە، د رۆژێن پێش دە، ب رایا گشتی رە پارڤە بکە.
ئەم دکارن ھلبژارتنێن شارەدارییان یێن 2024 بکن دەستپێکا ئاڤا کرنا بنگەھێ “مەرجێ خوەسەرییا برێڤەبرییا ھەرێمی یا ئەورۆپایێ”؛ ب ڤێ بیر و باوەرییێ ئەم دکارن سیاسەت و خەباتەک ھلبژارتنێ یا بەرفرەھ و ھەڤبەش بمەشینن و دڤێت ئەم بمەشینن.
ئەم دبێژن، وەرن ئەم ب ڤێ بیر و باوەرییێ و ب ھەڤ رە، د ھلبژارتنێن شارەدارییان یێن 2024، ھەلوەستەک ھەڤبەش پێشڤە ببن!
ئەم بانگی ھەموو دەزگەھێن سڤیل، پارتی، تەڤگەر و گرۆپێن سییاسی و کەسایەتێن قەبوولباریێن باژارێن خوە دکن کو ژ بۆ دەستپێکرنا پێڤاژۆیەکە وەھا ئەم ب ھەڤ رە گاڤێ باڤێژن!
3/1/2024
مەجلیسا پارتییێ یا PWK (پارتییا وەلاتپارێزێن کوردستانێ)
