نیقاشێن دەربارێ ئەگەرا تفاقا ناڤبەرا ئاک پارتی و دەم پارتی دە یا بۆ ھلبژارتنێن ھەرێمی بەردەوامە. چاڤدێرێن سیاسی بالێ دکێشن ناڤبەرا ئاک پارتی و دەم پارتی دە ھەڤدیتن چێبوونە، لێ ھین ژی ئەنجامەک ژێ دەرنەکەتیە ژ بەر کو لگەل جەهەپێ ژی ھەڤدیتن ھەنە و دەم پارتی داخوازا گەرەنتیێ ژ ئالیان دکە.
ب نێزیکبوونا ھلبژارتنێن ھەرێمی نیقاشێن سەر هەڤپەیمانیان زێدەتر دبن و د پێڤاژۆیا ھلبژارتنێ دە یەک ژ مژارێن گەلەک تێ نیقاشکرن ئیختیمالا هەڤپەیمانیا ئاک پارتی دەم پارتی یا بۆ ھلبژارتنێن شارەداریێن باژارێن مەزنە کو ئاکادەمیسیەن بالێ دکێشن ئالیەک دخوازە دەم پارتی پشتگریا ئاک پارتیێ بکە دا کو ئاک پارتی ژ بن باندۆرا مەھەپێ دەربکەڤە لێ دڤێت نەیێ ژبیرکرن کو ئاک پارتی ئێدی نە ئاک پارتیا بەرێیە و ژ ئاخافتنێن ئۆزگور ئۆزەل خویا دبە کو دەمپارتی بێھتر نێزیکی جەهەپێ یە.
ئاکادەمیسیەنێ زانکۆیا دیجلە یێ بەشا زانستێن سیاسی وەدات کۆچال ژ کوردستان 24ێ رە گۆت: “مە ژی بھیستیە کو د ناڤبەرا ئاک پارتی و دەم پارتی دە ھەڤدیتن چێبوونە، قاسی کو ئەز دزانم ئاک پارتیێ ژ دەم پارتی رە گۆتیە، “ژ خوە دیارە دێ ل دیاربەکر دەم پارتی ب سەر بکەڤە و بلا دەم پارتی کاندیدەک وسا نیشان نەدە کو حکوومەت نەچاری دانینا قەیومی ببە.” ب نێرینا من نھا دەم پارتی نێزیکی جەهەپێ یە و ئەز تەخمین دکم کو دێ دەم پارتی ل ستەنبۆلێ کاندیدەکی نیشان نەدە.”
چاڤدێرێن سیاسی و مافناس ژی ئاماژە دکن کو رەوشا دەم پارتی تێ دەیە نە رەوشەک ھێسانە کو ھەم ناخوازە خەلەتیێن بەرێ دوبارە بکە و ھەم ژی دخوازە ھەلوەستەک وسا نیشان بدە کو د بەرژەوەندیا گەلێ کورد دە بە.
چاڤدێرێ سیاسی و مافناس سەدات یوورتداش ژی دبێژە: “دەم پارتی لگەل کیژان پارتییێ دبە بلا ببە دکارە بکەڤە ناڤا بازار و دیالۆگێ دە دا کو بکاربە بەرژەوەندیێن گەلێ کورد بپارێزە. ژ بەر کو د رابردوویێ دە تێکچوون و ونداکرنێن مەزن چێبوون.”
ھەدەپێ د ھلبژارتنێن 2019 دە ل ستەنبۆلێ پشتگریا جەهەپێ کر جەهەپە ب سەر کەت لێ ھەدەپێ تشتەک ب دەست نەخست، ھلبژارتنێن سالا بۆری دە دیسا پشتگریا جەهەپێ کر لێ دیسا تشتەک ب دەست نەخست، ڤێ جارێ چاڤدێر بالێ دکێشن دەم پارتی پشتگریا کی بکە بلا بکە دڤێت گەرەنتیەکا دەستکەفتێ بستینە.
