گونده‌وارێ قامشلۆ.. بالافره‌كه‌ كه‌شفێ بۆمبه‌ ل فه‌وجه‌كا هه‌سه‌دێ باراندن

د یه‌كه‌م ئێریشا سالا نوو 2024ێ ده‌، بالافره‌كه‌ كه‌شفێ یا ده‌وله‌تا ترك ئیرۆ رۆژا یه‌كشه‌می بۆمبه‌ ل فه‌وجه‌كه‌ چه‌كدارێن هێزێن سووریه‌یا ده‌مۆكراتیك هه‌سه‌دێ باراندن.

روانگه‌ها سووری یا مافێن مرۆڤان ئیرۆ رۆژا یه‌كشه‌می 7/1/2024ێ راگهاند كو بالافره‌كه‌ كه‌شفێ یا ده‌وله‌تا ترك ل گونده‌وارێ گوندێ گرسۆرێ یێ گرێدای باژارێ قامشلۆیێ بۆمبه‌ ل فه‌وجه‌كه‌ چه‌كدارێن هه‌سه‌دێ باراندن.

روانگه‌هێ ئاشكه‌ره‌ كریه‌ كو زرارێن ڤێ ئێریشێ ته‌نێ ماددی بوونه‌ و ت زرارێن جانی ده‌رنه‌كه‌تنه‌.

ئه‌ڤ ئێریشا ئیرۆ ب یه‌كه‌م د سالا نوو 2024ێ ده‌ تێ حه‌ساب كرن، ل داوییا سالا رابووری 2023ان ده‌وله‌تا ترك ئێریشێن خوه‌ یێن ل سه‌ر رۆژئاڤا كوردستان دژوار كربوون و نێزی 10 كادرۆ و به‌رپرسێن په‌كه‌كێ و یه‌په‌گێ د وان ئێریشان ده‌ كوشتن.