سزایێ دارڤەکرنێ یێ 2 گرتیێن کورد ل گرتیگەھا قزلحەسارا کەرەچ ھات جێبەجێ کرن. ئەو دو گرتیە ب تۆمەتا پێوەندیا وان ب مادەیێن ھشبەر ھەبوویە سزایێ دارڤەکرنێ ل سەر وان ھاتبوو سەپاندن.
سزایێ دارڤەکرنا کیۆمەرس خولامی یێ گرتیێ تەمەن 41 سالی یێ خەلکێ سەراولەیا پارێزگەھا ئیلامێ و محەمەد حوسێن گەراوەند یێ گرتیێ خەلکێ کۆیەشتی یا لۆرستان، ل گرتیگەھا قزلحەسارا باژارێ کەرەچ یا ئیرانێ ھات جێبەجێ کرن.
ئەو ھەردو گرتیێن کورد رۆژا 17/10/2023 ل گرتیگەھا قزلحەسار ب ئارمانجا جێبەجێ کرنا سزایێ دارڤەکرنێ ژ بۆ ئۆدەیا تاکەکەسی ھاتبوون ڤەگوھەستن.
محەمەد حوسێن گەراوەند و کیۆمەرس خولامی بەرێ ل سەر تۆمەتا پێوەندیا وان ب مادەیێن ھشبەر ڤە ھەیە ھاتبوون گرتن و پشترە ژ ئالیێ سازیا دادوەری یا ئیرانێ ڤە سزایێ دارڤە کرنێ ژ بۆی وان ھاتبوو دایین.
مەدیایا فەرمی یا ئیرانێ دارڤەکرنا وان ھەردو گرتیێن کورد پشتراست نەکریە و ئەڤ نووچە ھین بەلاڤ نەکرنە.
