کۆمسیۆنا سەربخوەیا ھلبژارتنان یا ئیراقێ و سەرۆکاتیا ھەرێما کوردستانێ ژڤانەکێ نوو ژ بۆ ھەلبژارتنێن پەرلەمانێ کوردستانێ دەستنیشان دکن.
سەرۆکێ تیما رۆژنامەڤانیێ یا کۆمسیۆنا بالایا سەربخوەیا ھلبژارتنان یا ئیراقێ عیماد جەمیل راگەھاند، د چەند رۆژێن بێ دە شاندەکا بلندا کۆمسیۆنێ ب سەرۆکاتیا ھەرێما کوردستانێ رە دجڤە، ب مەرەما دەستنیشانکرنا ژڤانەکێ نوو ژ بۆ ھلبژارتنێن گەرا شەشێ یا پەرلەمانا کوردستانێ.
پێشتر سەرۆکێ ھەرێما کوردستانێ نێچیرڤان بارزانی رۆژا 25 شباتا 2024 ژ بۆ ھلبژارتنێن گەرا شەشێ یا پەرلەمانا کوردستانێ دەستنیشان کربوو، لێ پاشتر سکالایەکا دژی قانوونا ھلبژارتنێن پەرلەمانا کوردستانێ ئامادەکاریێن کۆمسیۆنێ ژ بۆ ھلبژاتنان راوەستاندن.
ئەو سکالا ل دژی پێنج مادەیێن قانوونا ھلبژارتنێن پەرلەمانا کوردستانێ ھاتیە تۆمارکرن کو گرێدایی ھەژمارا کورسیێن پەرلەمانێ، یەکبازنەیی و پربازنەیی یێن ھلبژارتنان و ھەژمارێن کورسیێن کۆتایان ل پەرلەمانا کوردستانێ نە، و ژ ئالیێ سەرۆکێ فراکسیۆنا یەنەکێ ل گەرا پێنجێ یا پەرلەمانا کوردستانێ زیاد جەبار و ئەندامێ کرستیانان ل جڤاتا پارێزگەھا سلێمانیێ ئامانج نەجیب شەعمۆن ڤە ھاتنە تۆمارکرن.
رۆژا 27 بەرچلەیا 2023، دادگەھا فەدەرالی ژ بۆ جارا حەفتێ بریاردانا ل سەر وێ سکالایێ ژ بۆ رۆژا 21 چلەیا 2024 پاش خست.
عیماد جەمیل تەکەز کر، ژ بەر کو دادگەھا بالایا فەدەرالی زێدەتری حەفت جاران بریاردانا ل سەر وێ سکالایێ پاش خست، نەکارینە ئامادەکاریان ژ بۆ ھلبژارتنێن پەرلەمانا کوردستانێ تەمام بکن، لەوما داخواز کریە ژڤانەکێ نوو ژ بۆ ھلبژارتنان بێ دەستنیشانکرن.
ل گۆر زانیاریان، کۆمسیۆنا بالا یا سەربخوەیا ھلبژارتنان یا ئیراقێ د نڤیسارەکا فەرمی دە ژ بەرپرسێن ھەرێما کوردستانێ رە راگەھاندیە، ئارێشەیا دارایی ھەیە و حکوومەتا ئیراقێ ئەو پەرەیێ کو بریارە ژ بۆ ھلبژارتنان خەرج بکە وەکی پێدڤی دابین نەکریە، لەوما نەکاریە پرانیا رێکاران تەمام بکن.
