د دەما 24 دەمژمێرێن بۆری دە 2 کۆلبەرێن خەلکێ رۆژهلاتێ کوردستانێ ل ناڤچەیێن سینۆری یێن بانەیێ ب گوللـەیێن نۆبەدارێن سینۆری یێن ئیرانێ هاتن کوشتن و کۆلبەرەک ژی بریندار بوو.
سەرێ سبەها ئیرۆ کۆلبەرەکی ب ناڤێ میرزا ئەحمەدی یێ خەلکێ باژارێ بانەیێ، ل ناڤچەیا سینۆری یا زەلێ، ب گوللـەیێن هێزێن ئیرانێ هات کوشتن.
میرزا ئەحمەدی یێ 43 سالی خەلکێ گوندێ ئەنجنێ یە و باڤێ دو زارۆکان بوو.
هەر ل ناڤچەیێن سینۆری یێن باژارێ بانەیێ، دوهـ نۆبەدارێن سینۆری یێن ئیرانێ گوللـە ل کۆلبەران رەشاندبوون و دو گوللـە ل سینگا کۆلبەرەکی خەلکێ سەلماسێ یێ ب ناڤێ شۆرش خەرەگوشی کەتبوون و وی جانێ خوە ژ دەست دابوو.
شۆرش خەرەگوشیێ 33 سالی خەلکێ گوندێ زێوەجیکێ یێ باژارێ سەلماسا پارێزگەها ئورمیەیێ و باڤێ زارۆکەکی بوو.
ل گۆری رێخستنێن مافێن مرۆڤانێن رۆژهلاتێ کوردستانێ، د وان هەر دو بوویەران دە هێزێن ئیرانێ کۆلبەر بەرێ ئاگاهدار نەکرنە.
رۆژا دوشەمێ ژی، ل هەرێمێن سینۆرییێن نەوسوودێ یا باژارێ پاوەیێ، هێزێن نۆبەدارێن سینۆری گوللـە ل کۆلبەران رەشاندبوون و کۆلبەرەکی ب ناڤێ ئەمیر ئیلاهی بریندار بووبوو.
ئەمیر ئیلاهی 25 سالی بوو و خەلکێ باژارێ سەلاسا باوەجانی بوو و تێ گۆتن کو رەوشا وی یا تەندورستیێ نە باشە.
ل گۆری تۆرا مافێن مرۆڤان یا کوردستانێ، د سالا 2023یان دا هەری کێم 29 کۆلبەر ل پارێزگەهێن سنە، کرماشان و ئورمیێ ژ بەر سەدەمێن جودا جانێ خوە ژ دەست دایە و 228 کۆلبەر ژی بریندار بوونە.
