زارۆکەکە کورد کو نێزیکی دو مەھانە ل تاخا شێخ مەقسوودا حەلەبێ ژ ئالیێ تەڤگەرا جوانێن شۆرەشگەر یا سەر ب رێڤەبەریا خوەسەر ڤە ھاتیە رەڤاندن، ھەتا نھا چارەنڤیسا وێ نە دیارە.
مالباتەکە کوردا حەلەبێ راگھاند، کەچا وان ستێر ئەحمەد یا 14 سالی ژ 16 مژدارا 2023 ڤە ل تاخا شێخ مەقسوود ژ ئالیێ تەڤگەرا جوانێن شۆرەشگەر ڤە ھاتیە رەڤاندن و ھەتا نھا چارەنڤیسا وێ نەدیارە.
دیار کر ژی، کەچا وان ستێر ژدایکبوویا سالا 2009 و ژ پێش دەریێ دبستانا خوە “سەلاحەدین ئەیووبی” ھاتیە رەڤاندن.
مالباتا ستێرێ بانگ ل ھەموو رێخستنێن مافێن زارۆکان، رێخستنێن یاسایی و ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھێزێن سووریەیا دەمۆکراتیک (ھەسەد)ێ بکن تا کو چارەنڤیسا کەچا وان دیار بکن.
تاخێن ئەشرەفیێ و شێخ مەقسوود یێن حەلەبێ، وەک تاخێن کوردان تێن ناسین و د دەستێ یەپەگێ/ھەسەدێ دەیە و رێڤەبەریا خوەسەر ژی لێ ھاتیە راگھاندن. پشتی داگیرکرنا عەفرینێ ژ ئالیێ ئارتێشا ترکیێ و گرۆپێن چەکدار یێن سەر ب وێ ڤە، ھەژمارەک مەزن ژ کوردێن عەفرینێ لێ ب جھ بوونە.
تەڤگەرا جوانێن شۆرەشگەر، رێخستنەکا سەر ب رێڤەبەریا خوەسەر ڤەیە و گەلەک زارۆک و جوانێن کورد ل ھەرێمێن جودایێن کوردی رەڤاندنە و بچەک کرنە.
