پارتیا دەمۆکراسی و وەکھەڤیا گەلان (دەم-پارتی) و پارتیا گەلا کۆمارێ (جەهەپە) د دەربارێ ھلبژارتنێن شارەداریان دە دجڤن.
ھەڤسەرۆکێن دەم پارتیێ تونجەر باکرھان و توولای ھاتیمۆگلولار بریارە ئیرۆ سەردانا ناڤەندا گشتی یا جەهەپی ل ئەنقەرەیێ بکن و ب سەرۆکێ وێ پارتیێ ئۆزگور ئۆزەل رە بجڤن.
ل گۆر زانیاریان د ھەڤدیتنێ دە ھەر دو پارتی دێ بەحسا ستراتەژیێن خوەیێن ل سەر ھلبژارتنێن شارەداریان بکن.
ئەڤ د دەمەکێ دەیە، شەڤا بۆری جەهەپێ 242 نامزەدێن خوەیێن ھلبژارتنێن شارەداریان ئەشکەرە کرن، کو 6 ژ وان ژ بۆ شارەداریێن مەزنن.
پێشتر د 13 مەھا بۆری دە سەرۆکێ گشتی یێ جەهەپێ ئۆزگور ئۆزەل و شاندا پێ رە ل ئەنقەرەیێ سەردانا ناڤەندا گشتی یا دەم پارتیێ کربوو.
پشتی جڤینێ ژی، ھەڤسەرۆکێ دەم پارتی تونجەر باکرھان گۆت: “ھەڤدیتنەکە بەرھەمدار بوو. مە بەحسا قەیرانا ئابۆری، دەمۆکراسی، پرسا کورد، قەیوم، ژینگەھ و ھەموو پرسگرێکێن ترکیەیێ کر. ئەم دبێژن، پارتیێن سیاسی دڤێت پرسگرێکان ب دیالۆگ و ھەڤدیتنان چارەسەر بکن. نھا زێدەتر پێویستی ب دیالۆگێ ھەیە.”
د ھلبژارتنێن 2019 شارەداریان دە و ھلبژارتنێن 14 و 28 گولانێ دە ھەدەپێ پشتەڤانیا جەهەپێ کربوو. لێ نھا وەک بەردەوامیا ھەدەپێ و پارتیا چەپا کەسک، دەم پارتی دبێژە ئەوێ ل ھەموو باژاران کاندیدێن خوە ئەشکەرە بکن و ب بریارن شارەداریێن ژ دەستێ وان ھاتنە دەرخستن و قەیوم ھاتنە دانین ڤەگەرینن.
