د جڤینا خوە یا ل گەل نوونەرا تایبەتا سکرتێرێ گشتییێ نەتەوەیێن یەکگرتی ژ بۆ کاروبارێن زارۆکان و هەڤرکیێن چەکداری دە، سەرۆکێ حکوومەتا هەرێما کوردستانێ ئامادەهیەکا تەمام ژ بۆ ئالیکاری و هەڤاهەنگی و بجهانینا پرۆژەیێن هەڤپارێن گرێدایی مافێن زارۆکان ب نەتەوەیێن یەکگرتی رە دیار کر.
سەرۆکێ حکوومەتا هەرێما کوردستانێ مەسروور بارزانی ئیرۆ پێنجشەمیێ 11ێ چلەیا 2024ێ پێشوازیا نوونەرا تایبەتا سکرتێرێ گشتییێ نەتەوەیێن یەکگرتی ژ بۆ کاروبارێن زارۆکان و هەڤرکیێن چەکداری ڤرجینیا گامبا کر.
د وێ جڤینێ دە، نوونەرا تایبەتا سکرتێرێ گشتییێ نەتەوەیێن یەکگرتی کورتیەک ل سەر کار و چالاکیێن وان و ئارمانجا سەردانا وان ژ بۆ ئیراق و هەرێما کوردستانێ پێشکێش کر. هەروەسا پەسنا بزاڤ و رێکار و پلانێن حکوومەتا هەرێما کوردستانێ ژی د وارێ پاراستنا مافێن زارۆکان دە کر.
نوونەرا تایبەتا سکرتێرێ گشتییێ نەتەوەیێن یەکگرتی هەروەسا دلخوەشیا خوە ژی دیار کر کو سەرۆکوەزیر مەسروور بارزانی فەهماندنەکا باش ژ بۆ گرنگیا پاراستنا مافێن زارۆکان و ئەرک و ئارمانجێن نەتەوەیێن یەکگرتی یێن گرێدایی ڤی واری هەیە.
سەرۆکوەزیر مەسروور بارزانی ئامادەهیا حکوومەتا هەرێما کوردستانێ ب تەمامی ژ بۆ ئالیکاری و هەڤاهەنگی و بجهانینا پرۆژەیێن هەڤپارێن گرێدایی مافێن زارۆکان ب نەتەوەیێن یەکگرتی رە دیار کر.
