د ئەنجاما ئێریشەکە پەکەکێ دە ل سەر بنکەیەکە ئارتێشا ترکیەیێ ل ناڤچەیێن سینۆری یێن ھەرێما کوردستانێ دە، 9 لەشکەرێن ترکیەیێ ھاتنە کوشتن، ئارتێشا ترکیەیێ ژی ھەژمارەک بنکەیێن پەکەکێ بۆمبەباران کرن.
وەزارەتا بەرەڤانیێ یا ترکیەیێ شەڤا بۆری راگھاندبوو، ل ناڤچەیا ئۆپەراسیۆنا پەنچە-کلیتێ ئەندامێن پەکەکێ ئێریشی بنگەھەکە وان کرنە و د ئەنجامێ دە 5 لەشکەر ھاتنە کوشتن و 8 لەشکەر ژی بریندار بوونە.
وەزارەتێ د پشترە ب سێ داخویانیێن دن ئەشکەرە کر، 4 لەشکەرێن وان یێن رەوشا وان گران بوو ژی جانێ خوە ژ دەست دانە و ب ڤی ئاوایی ھەژمارا کوشتیان گھشتیە 9 لەشکەران.
پشتی ئێریشا پەکەکێ، ترکیێ، بنگەھێن پەکەکێ یێن ل گارێ، زاپ، مەتینا، خاکورکێ و قەندیلێ و ھن جھ و ناڤچەیێن رۆژئاڤایێ کوردستانێ ب فرۆکەیان بۆمبەباران کرن.
دەربارێ زیانێن پەکەکێ دە ژی، وەزارەتا بەرەڤانیێ یا ترکیێ راگھاند، 12 چەکدارێن پەکەکێ ھاتنە کوشتن.
ئێریشا پەکەکێ یا ل سەر ئارتێشا ترکیێ د ھوندرێ ترکیێ دە بوو سەدەما کارڤەدانێن مەزن، ئیرۆ ژی جڤینەکە ئەولەھیێ ب سەرۆکاتیا سەرۆکۆمارێ ترکیێ رەجەب تەییب ئەردۆگان تێ لدارخستن.
ل گۆری زانیاریان، جڤین دێ ل ستەنبۆلێ ل کۆشکا دۆلماباخچەیێ بێ لدارخستن و وەزیرێ دەرڤە، بەرەڤانی، ناڤخوە، سەرۆکەرکانێ ترکیەیێ و سەرۆکێ دەزگەھا ھاوالگرییا ترکیەیێ (میت) دێ تێ دە ئامادە بن.
