وەزیرێ کارێن ناڤخوەیێ ترکیەیێ راگهاند کو وان ل 32 پارێزگەهان ل دژی «رێخستنا تەرۆرێ یا دابەشکەر» ئۆپەراسیۆن پێک ئانینە و د ئەنجام دە 113 کەس هاتنە دەستەسەرکرن.
وەزیرێ کارێن ناڤخوەیێ ترکیەیێ عه‌لی یەرلیکایا ل سەر حەسابێ خوە یێ تۆرا جڤاکی پەیامەک بەلاڤ کر.
وەزیرێ کارێن ناڤخوەیێ ترکیەیێ عه‌لی یەرلیکایا گۆت:
«ب کۆئۆردینەیا سەرۆکاتیا دائیرەیا رووبرووبوونا تەرۆرێ یا فەرمانداریا گشتی یا جەندەرمەیان و سەرۆکاتیا ئیستیخباراتێ د چارچۆڤەیا ئاستەنگکرنا چاڤکانیێن ئابۆری و چالاکیێن رێخستنێن تەرۆرێ ل 32 پارێزگەهان ئۆپەراسیۆن هاتنە کرن و د ئەنجامێ دە 113 کەس هاتنە دەستەسەرکرن».
ئۆپەراسیۆن ل پارێزگەهێن سەمسوور، ئاگری، چەولیگ، ئامەد، دیلۆک، مێردین، موش، ئیدر، جۆلەمێرگ، مەرەش، مەلەتی، سێرت، شرنەخ، دێرسم و وانێ یێن باکورێ کوردستانێ و ل 17 پارێزگەهێن ترکیەیێ هاتیە کرن.
وەزارەتا پاراستنێ یا ترکیەیێ راگهاندبوو کو ل باشوورێ کوردستانێ 9 لەشکەرێن وان هاتنە کوشتن، 4 لەشکەرێن وان ژی بریندار بوونە.
پشتی ڤێ یەکێ ل سەرانسەری ترکیە و باکورێ کوردستانێ ب تۆهمەتا تەرۆرێ هەژمارەکە زێدە یا وەلاتیان هاتن دەستەسەرکرن و ئۆپەراسیۆن بەردەوامن.
