نێچیرڤان بارزانی ب سەرۆکوەزیرێ ئیراقێ رە جڤیا
سەرۆکێ هەرێما کوردستانێ نێچیرڤان بارزانی ل به‌غدایێ ب سەرۆکوەزیرێ ئیراقێ محه‌مه‌د شه‌یاع سوودانی رە جڤیا.
نێچیرڤان بارزانی و محه‌مه‌د شه‌یاع سوودانی تەکەزی ل سەر وێ یەکێ کرن کو دڤێ ئیراق ژ پرسگرێک و ناکۆکیێن ناڤچەیی دوور بمینە.
سەرۆکێ هەرێما کوردستانێ نێچیرڤان بارزانی ل به‌غدایا پایتەختا ئیراقێ ب ئامادەبوونا گەلەک بەرپرسان بەشداری مەراسیما ببیرانینا 21 مین سالڤەگەرا کوشتنا محه‌مه‌د باقر حەکیم بوو.
نێچیرڤان بارزانی پشتی مەراسیمێ ب سەرۆکوەزیرێ ئیراقێ محه‌مه‌د شه‌یاع سوودانی رە هەڤدیتەنەک پێک ئانی.
سەرۆکاتیا هەرێما کوردستانێ ل سەر هەڤدیتنێ داخویانیەک بەلاڤ کر.
ل گۆری داخویانیێ، د هەڤدیتنێ دە رەوشا سیاسی و ئەولەهیێ یا ئیراقێ، پێشهاتێن داوی یێن ناڤچەیێ و پێوەندیێن ناڤبەرا هەولێر و به‌غدایێ هاتنە گۆتووبێژکرن.
د داخویانیێ دە هاتە راگهاندن کو بارزانی و سوودانی تەکەزی ل سەر وێ یەکێ کرن کو دڤێ ئاشتی، ئارامی و سەروەری ل وەلات وەرە پاراستن و ئیراق ژ پرسگرێک و ناکۆکیێن ناڤچەیی دوور بێ خستن.
هەروها د هەڤدیتنێ دە پێنگاڤێن هەڤبەشێن حکوومەتێن هەرێما کوردستانێ و ئیراقێ ژ بۆ چارەسەرکرنا بوودجە، مووچە، هنارتنا پەترۆلێ و پرسگرێکێن دن یێن ئیداری، دارایی و ئابۆری هاتن گۆتووبێژکرن.
سەرکردەیان ئاماژە ب وێ یەکێ ژی کر کو دڤێ پرسگرێک ل گۆری دەستوورێ بێن چارەسەرکرن و دیار کرن کو ئەو ل سەر هەمان نێرینێنە کو وەلاتیێن هەرێما کوردستانێ ژ ڤێ رەوشێ زرارێ نەبینن.
هەروها سەرۆکێ هەرێما کوردستانێ نێچیرڤان بارزانی تەکەز کر «دڤێ چارەسەریەکە داوی ژ بۆ مژارا مووچەیێن فەرمانبەرێن هەرێما کوردستانێ هەبە و ب مژارێن دن رە نەیێ تەڤلیهەڤکرن».
ل ئالیێ دن ئۆفیسا محه‌مه‌د شه‌یاع سوودانی ژی ل سەر جڤینێ داخویانیەک بەلاڤ کر.
د داخویانیێ دە هاتە راگهاندن کو هەر دو ئالیان ل سەر چارەسەریا پرسگرێکێن ناڤبەرا هەولێر و به‌غدایێ ل گۆری دەستوورێ گۆتووبێژ کرنە.
