د چه‌ند رۆژێن داویێ ده بالافرێن كه‌شفێ یێن ده‌وله‌تا ترك، پێتری 90 پێگه‌هان ل رۆژئاڤا كوردستانێ بۆمبه‌باران كرنه، پرانی ژێ سازیێن گرینگ یێن خزمه‌تگوزاری و ئابووری نه.
روانگه‌ها سووری یا مافێن مرۆڤان راپۆره‌ك ده‌ربارێ زرارێن ئێریشێن رۆژێن رابووری یێن بالافرێن كه‌شفێ یێن تركیێ ل سه‌ر ناڤچه‌یێن باكور و رۆژهلاتا سووریێ پارڤه‌كریه، ل گۆری وێ پێتری 90 پێگه‌هان كه‌تنه به‌ر ئێریشان پرانی ژێ سازیێن ئابووری و خزمه‌تگوزاری نه.
روانگه‌ها سووری د راپۆرا خوه ده ئاماژه كر كو ده‌وله‌تا ترك ب سه‌ده‌ما په‌كه‌كێ و باسكێن وێ یێن ل رۆژئاڤا كوردستانێ په‌یه‌دێ و هه‌سه‌دێ حه‌مله‌یه‌كه به‌رفه‌ره‌هـ ئا ئێریشێن ب درۆنان ل باكور و رۆژهلاتێ سووریێ ده‌ستپێكریه و گۆت كو ژ ده‌ستپێكا مه‌ها 11 یا سالا رابووری 2023ێ و هه‌یا دوهـ رۆژا ئینی 12/1/2024ێ پێتری 90 سازی و پێگه‌هێن ژێرخانه‌یی هاتنه بۆمبه‌باران كرن.
پێگه‌هێن هاتنه بۆمبه‌باران كرن ل باژارێن قامشلۆ، كۆبانێ، حه‌سه‌كێ، دربێسیێ، رمێلان، تل ته‌مر، قه‌حتانیێ، عامۆدێ و دێركێ و گه‌له‌ك هه‌رێمێن دن.
د ئێریشان ده، پێگه‌هێن هه‌سه‌دێ و یه‌په‌گێ، هه‌ر وها وه‌ستگه‌هێن ئه‌لكتریكێ، په‌ترۆلێ، نه‌خوه‌شخانه و سایلۆ و كارگه‌هێن پیشه‌سازی یێن جودا هاتنه ژناڤ برن، هه‌ر وها ب ده‌هان چه‌كدارێن هه‌سه‌دێ و یه‌په‌گێ هاتنه كوشتن و وه‌لاتیێن سڤیل ژی ژیانا خوه ژ ده‌ست دا نه و بریندار كه‌تنه.
