ئارتێشا ترکیەیێ، دەڤەرێن مەتینا، خاکورک و قەندیل یێن باشوورێ کوردستان و دێرک و تربەسپیێ یێن رۆژئاڤایێ کوردستانێ بۆمبەباران کرن.
وەزارەتا بەرەڤانیێ یا ترکیەیێ دا خویاکرن، شەڤا بۆری دەمژمێر 21:00، فرۆکەیێن شەری یێن ئارتێشا ترکیێ، ل دەڤەرێن مەتینا، خاکورک و قەندیل بۆمبەباران کرنە.
دا زانین ژی، د ئۆپەراسیۆنێ دە 25 شکەفت، ستارگەھ و کۆمگەھێن جەبلخانەیێن بارەگەھێن پەکەکێ ھاتنە ئارمانجکرن و ژناڤبرن.
ژ ئالیێ خوە ڤە، رەوانگەھا سووری یا مافێن مرۆڤان بەلاڤ کر، درۆنەکە ترکیەیێ چەند جاران ئێریشی کێلگەھا پەترۆلێ یا ئەودێ ل تربەسپیێ و گوندێ سرکێ ل دێرکێ بۆمبەباران کرن.
ئەڤ ئێریش پشتی وێ تێن، بەری دو رۆژان د ئەنداما ئێریشەکە پەکەکێ دە ل سەر بنکەیەکە ئارتێشا ترکیەیێ ل ناڤچەیێن سینۆری یێن ھەرێما کوردستانێ دە، 9 لەشکەرێن ترکیەیێ ھاتن کوشتن.
پشتی ئێریشا پەکەکێ، ترکیە، بنگەھێن پەکەکێ یێن ل گارێ، زاپ، مەتینا، خاکورکێ و قەندیلێ و ھن جھ و ناڤچەیێن رۆژئاڤایێ کوردستانێ ب فرۆکەیان بۆمبەباران کرن.
د ڤێ دەربارێ دە، سەرۆککۆمارێ ترکیەیێ رەجەب تەییب ئەردۆگان دوھی راگھاند، “گەفێن لسەر ھەبوونا کۆمارا ترکیەیێ، دێ د چاڤکانیان دە وەرن ئاستەنگکرن. ئێریشێن ل دژی پەکەکێ و پشتەڤانێن وان ب بریار دێ بدۆمن.”
