ل قامشلۆ کەچەکا 15 سالی ژ ئالیێ چەکدارێن پەکەکێ ڤە ھات رەڤاندن
![ل قامشلۆ کەچەکا 15 سالی ژ ئالیێ چەکدارێن پەکەکێ ڤە ھات رەڤاندن](https://darkamazi.net/file/2024/01/zarok-revandin.jpg)
نڤیسکار و یاساناسێ کورد ئاشکەرا دکە کو ل باژارێ قامشلۆ یێ رۆژئاڤایێ کوردستانێ کەچەکا 15 سالی ژ ئالیێ چەکدارێن پەکەکێ ڤە ھاتیە رەڤاندن.
ڤێ دەربارێ دە نڤیسکار و یاساناس حوسێن چەلەبی راگەھاند، چەکدارێن پەکەکێ کەچەکا تەمەن 15 سالی ل باژارێ قامشلۆ یێ رۆژئاڤایێ کوردستانێ رەڤاندیە، کو بەشداری ناڤ رێزێن خوە بکن.
ھەروەھا ئاشکەرا کر، ناڤێ وێ کەچێ پەروین ئیبراھیمە و د مالباتا خوە دە تەنێ ئەو کەچە و 3 برایێن وێ ھەنە. د پۆلا نەھەم دە دخوینە و خەلکا گوندێ قەرەحەسەنە و ل قامشلۆ ژ ئالیێ پەکەکێ ڤە ھاتیە رەڤاندن.
حوسێن چەلەبی گۆت، مالباتا وێ کەچێ چوونە بنکەیێ ھێزێن سووریا دەمۆکراتیک (ھەسەد)ێ یا ل حەسەکێ ژ بۆ کو رەوشا زارۆکا خوە بزانن، لێ بێ ئەنجام ڤەگەریانە.
ل گۆر پرۆتۆکۆلا پەیمانامەیا مافێن مرۆڤان رێگری ل گرۆپێن چەکدار تێ کرن کو زارۆک بێن بکارئانین و راکێشن ناڤ ھێزێن شەر و ئەڤ یەک وەک تەوانا شەر تێ حەسباندن و د دادگەھا ناڤنەتەوی یا دادگەھا رۆما ژی ئەڤ یەک تەوانا شەرە.
پەکەکێ ب سەدان زارۆکان د تەمەنێ ناڤبەرا 12 ھەتا 15 سالی رەڤاندنە کو ژ بۆ شەری وان بکاربینە.
چاڤدێر دبێژن ئەڤ یەک تەوانەکا مەزن یا پەکەکێ یە و زارۆکان بکارتینن ژ بۆ شەر، ھەروەھا وان ژ خواندنێ بێپار دھێلن و ئەڤ یەک ژی بنپێکرنا مافێن مرۆڤان یا ئاشکەرایە.
![](https://darkamazi.net/file/2024/01/%D8%B2%D8%A7%D8%B1%DB%86%DA%A9-%D8%B1%DB%95%DA%A4%D8%A7%D9%86%D8%AF%D9%86.jpg)