ئیراق دێ ژبه‌ر ئێریشا سه‌ر هه‌ولێرێ سكالایێ ل ئه‌نجومه‌نا ئاساییشا ناڤده‌وله‌تی تۆمار كه‌ت

وەزارەتا کارێن دەرڤە یا ئیراقێ، ل سەر ئێرشێن شەڤا بۆری یێن ل هەولێرێ داخویانی دا و راگهاند كو وان كۆمیته‌یه‌ك بۆ لێكۆلینێ پێكئانیه‌ و دێ سكالایێ ل ئه‌نجومه‌نا ئاساییشا نێڤده‌وله‌تی تۆمار كه‌ن.

سوپایا پاسدارانا ئیرانێ شەڤا بۆری ب مووشەکێن بالیستیک ئێرشی هەولێرێ کر، وەزارەتا کارێن دەرڤە یا ئیراقێ، د داخویانیا خوە دە ئەڤ ئێرشێن ئیرانێ ب توندی شەرمەزار کرن.

د داخویانیێ دە هات گۆتن کو د ڤان ئێرشێن ئیرانێ سڤیلێن بێگونەهـ شه‌هید كه‌تن.

هەروها هات راگهاندن کو سەرۆکوەزیرێ ئیراقێ محەمەد شه‌یاع سوودانی ژ بۆ ل سەر ڤان ئێرشان لێکۆلینان بکە و ئاگاهیان بەرهەڤ بکە لژنەیەک ئاڤا کریە.

سوپایا پاسدارانا ئیرانێ شەڤا بۆری دەردۆرا سائەت 23:30ی ب دەهـ مووشەکان ئێرشی هەولێرێ کر و پێنج ژ ڤان مووشەکان ل مالا کارسازێ کورد پێشرەو دزەیی کەتن.

د ڤێ ئێرشا ئیرانێ دە پێشرەو دزەیی، کەرەم مخاییلێ کو کارسازەکی ئیراقی یێ خریستیانە و دەما ئێرشێ مێڤانێ پێشرەو دزەیی بوویە و کەچا پێشرەو دزەیی یا ب ناڤێ ژینە شه‌هید كه‌تن.

ژینەیا کو د ئێرشا ئیرانێ دە شه‌هید بوو ل 25ێ ڤێ مەهێ دێ ببا یەک سالی.

ل ئالیێ دن، درۆنەک ل پیرمامێ و یەک ژ ل به‌حرکەیێ هاتن خستن.

سەرۆکوەزیرێ هەرێما کوردستانێ مەسروور بارزانی، ئەڤ ئێرشێن ئیرانێ ب توندی شەرمەزار کرن.