سەرۆکاتیا هەرێما کوردستانێ ئێریشا ئارتێشا پاسدارێن ئیرانێ ل سەر هەولێرێ شەرمەزار دکە و رادگەهینە، «بەهانەیا ئارتێشا پاسدارێن ئیرانێ ژ بۆ ئێریشا ل سەر هەولێرێ ب تەمامی بێبنگەهـ و دووری راستیێیە».
سەرۆکاتیا هەرێما کوردستانێ ئیرۆ (سێشەم، 16.1.2024) پەیامەک پارڤە کریە کو دە هاتیە، ئەم وێ ئێریشا دژمنکاری یا کو ئارتێشا پاسدارێن ئیرانێ شەڤا بۆری ب مۆشەکێن دوورهاڤێژ کریە سەر هەولێرێ گەلەک ب توندی شەرمەزار دکن، کو د ڤەرێژا وێ دە هەژمارەکا وەلاتیان بریندار و شەهید بوونە.
هەروەسا د به‌شه‌كا وێ پەیامێ دە هاتیە، «ئەم سەرەخوەشیێ ل مالبات و کەسووکارێن شەهیدان دکن، ئەم هەڤسۆز و هەڤخەمێن وانن و ئەم داخوازا زووچارەبوونێ ژ برینداران رە دکن».
سەرۆکاتیا هەرێما کوردستانێ هەروەسا راگەهاند، «بەردەوامیا ئارمانجکرنا هەرێما کوردستانێ و شەهیدکرنا وەلاتیان تاوانەکا بێبەهانە و دژی قانوونێن ناڤدەولەتی و جیرانیێ و نرخێن مرۆڤییە، هەروەسا بنپێکرنەکا بەرچاڤا سەروەری و ئارامی و سەقامگریا ئیراقێیە. هەرێما کوردستانێ قەت ژ بۆ چ ئالیەکی چاڤکانیا گەفان نەبوویە و دێ نەبە».
هەروەسا گۆتیە، «بەهانەیا ئارتێشا پاسدارێن ئیرانێ ژ بۆ ئێریشا ل سەر هەولێرێ ب تەمامی بێبنگەهـ و دووری راستیێیە، لەوما ئەم داخوازێ ژ حکوومەتا فەدەرالی یا ئیراقێ دکن کو ژ بۆ دیارکرنا راستیان ب لەز دەست ب لێکۆلینان بکە، هەروەسا ئەرکێ خوە ژ بۆ پاراستنا هەرێما کوردستانێ ب جهـ بینە و رێیێ ل وان ئێریشان بگرە».
