دەستەیا بلندا چاندی و جڤاکی یا بنکەیا لالەشێ ل دھۆکێ ئێریشا مووشەکی یا ل سەر ھەولێرێ شەرمەزار کر و گۆت: “ئارمانجا ئێریشان، تێکبرنا ئەولەکاری و ئارامیا کوردستانێ یە.”
دەستەیا بلندا چاندی و جڤاکی یا بنکەیا لالەشێ ئیرۆ 16 چلە د داخویانیەکێ دە ئێریشا مووشەکی یا شەڤا بۆری یا سوپایێ پاسدارێن ئیرانێ ل سەر ھەولێرێ شەرمەزار کر، کو د ئەنجامێ دە ھەژمارەک وەلاتیێن سڤیل شەھید بوون و چەند کەسێن دن ژی بریندار بوون.
دەستەیێ، ئێریشا سوپایێ پاسداران یا ل سەر ھەولێرێ ب “بێ بھانە” ب ناڤ کر و گۆت، ئارمانجا وان ئێریشان “تێکدانا ئاساییش و ئارامیا ھەرێما کوردستانێ” و بنپێکرنا ئەشکەرە یا سەروەریا ئیراقێ یە.
د داخویانیێ دە ھات گۆتن: “ئەم بانگ ل حکوومەتا ئیراقێ و جڤاکا ناڤدەولەتی دکن کو ل ھەمبەر ئێریشێن مووشەکی یێن ل سەر ھەرێما کوردستانێ ھەلوەستەکە جدی نیشان بدن.”
شەڤا بۆری (دوشەمبی، 15/1/2024) چەند دەڤەرێن سڤیلان ل ھەولێر و دەردۆرا وێ ب چەند مووشەکێن بالستی و درۆنان ھاتن ئارمانجکرن. پشترە ژی پاسدارێن شۆرەشا ئیرانێ بەرپرسیاریا ئێریشان گرت سەر خوە.
