سەرۆکۆمارێ ترکیەیێ رەجەپ تاییپ ئەردۆگان جارەکە دن گەفا ئۆپەراسیۆنەکە نوو ل دژی رۆژئاڤایێ کوردستانێ ژ تل رفعەتێ هەتا ب حەسەکێ خوار.
ئەردۆگان پشتی جڤینا کابینەیا خوە ئاشکەرە کر، ئەوێ ئۆپەراسیۆنێن خوە یێن دەرڤه‌یی سینۆر بەرفرەهـ بکن. ئۆپەراسیۆنێن وان یێن ل سەر سینۆرێ باشوورێ کوردستانێ دێ بەردەوام بکە و دێ ل سەر سینۆرێ رۆژئاڤایێ کوردستانێ ژی د مەهێن پێش دە ئۆپەراسیۆنەکە نوو بکن.
ئەردۆگان دیار دکە کو ئەو ژ بۆ ئۆپەراسیۆنەکە نوو گوهـ نادە گۆتنێن جڤاکا ناڤدەولەتی و ژ تەل رفعه‌تێ هەتا حەسەکێ بنگەهێن هه‌سه‌دێ ژناڤ ببن.
ئەردۆگان وه‌ها ئاخڤی: «هەتا کو هەر بۆستێ چیایێن باکورێ ئیراقێ ئەولە بکن، دێ ئۆپەراسیۆنێن مە یێن ل ڤێ ناڤچەیێ بەردەوام ببە. ب هەمان ئاوایی ل سووریەیێ، ژ تەل رفعەتێ هەتا کۆبانیێ، ژ حەسەکێ هەتا منبجێ هێلینێن تەرۆرێ هەتا کو ژناڤ نەبن راناوەستن. ژ بۆ ڤان ناڤچەیان سۆز دابوون مە لێ پابەندێ سۆزێن خوە نەبوون. مادەم وسایە، ئەم ژی دێ رێکارێن خوە وەربگەرن و د مەهێن پێش دە گاڤێن نوو باڤێژن. ئەمێ ب ئۆپەرایسۆنێن خوە یێن نوو، پاشه‌رۆژا خوە گەرەنتی بکن».
سەرۆکۆمار ترکیەیێ ئاماژە ب وێ یەکێ کر ژی، وان خوینا لەشکەرێن خوە ل ئەردێ نەهشت و تەنێ د 5 رۆژێن داوین د ئێریشێن ئاسیمانی یێن ل باشوور و رۆژئاڤایێ كوردستانێ، ل 114 ئارمانجان دانە کو تێ دە، 78 کەس هاتن کوشتن.
هەروها ئەردۆگان گۆت ژی، ئیستیخباراتا ترکیەیێ ژ 12ێ چلەیێ ڤر ڤە، 60 جهێن بنەسازیێ ژناڤ برنە.
