ل پارێزگەها ئامەدێ یا باکورێ کوردستانێ، پارتیێن سیاسی یێن کوردستانی ئێرشێن ئیرانێ یێن ل سه‌ر هەولێرێ كو بوون سەدەما مرنا 4 سڤیلان و برینداربوونا 16 سڤیلان شەرمەزار کرن.
پارتیا وەلاتپارێزێن کوردستانێ (PWK)، پارتیا ماف و ئازادیان (هاک-پار) و تەڤگەرا ئازادیێ، ل دژی ئێرشا ئیرانێ یا ل هەولێرێ ل جەمعیەتا رۆژنامەگەران یا ئامەدێ جڤینەکە چاپەمەنیێ ل دار خست.
پارتیێن سیاسی ئێرشێن ئیرانێ شەرمەزار کرن.
ئالیکارێ سەرۆکێ گشتی یێ پارتیا وه‌لاتپارێزێن كوردستانێ مەهمەت جان ئازبای داخویانیا هەڤبەش ب کوردی، سەکرەتەرێ گشتیریێ هەرەکەتا ئازاد مەتین پیرانی ژی ب ترکی خوەند.
داخویانیا پارتیێن سیاسی وهایە:
گه‌لێ کوردستانێ ل هەمبەری ئێرشێن تەرۆری یێن ئیرانێ دێ سەری نەتەوینە.
15ێ کانوونا پاشین، سووپایا پاسدارێن دەولەتا ئیرانێ ب گەلەک فرۆکەیێن بێمرۆڤ و مووشەکێن بالیستیک ئێرشی گەلەک جهێن سڤیلان یێن ل هەولێرێ کر.
د ڤان ئێرشان دە 4 سڤیلان ژیانا خوە ژ دەست دا، 16 کەس بریندار بوون، د ئەنجاما شەواتێ دە خسار گهشت مالان.
ئەم ڤان ئێرشێن هۆڤانە، دژی مرۆڤی و نه ره‌وا ل دژی هەولێرا پایتەختا دەولەتا فەدەرال یا کوردستانێ شەرمەزار دکن.
ب تایبەتی ژ سالا 2020ی و ڤر ڤە ب دەهان جاران ئیرانا تەرۆریست ب هنجەتێن بێبنگەهێن وەکی (ئەم بارەگەهێن کۆمێن دژی ئیرانێ دکن ئارمانج) ب مووشەک و بالافرێن بێمرۆڤ ئێرشی کوردستانێ کر. هەر تم کەسێن سڤیل بوونە ئارمانج.
وەلاتێن داگیرکەرێن جیرانێ کوردستانێ، ب تایبەتی ژی ترکیە، دەم ب دەم ب هنجەتێن جودا ئێرشان ل دژی ئاخا کوردستانێ پێک تینن.
ئەم دزانن کو ئەڤ ئێرش ژ دژمناتیا گەلێ کوردستانێ و ل دژی ئیرادەیا گەلێ کورد تێن کرن.
لێ ل گەل هەموو پرسگرێکێن هەیی ژی کوردستان هەرێمەکە ئارامه، لاندكا پێکڤەژیان و دەمۆکراسیێ یە.
ئێرشا ل سەر هەولێرێ بنپێکرنا ئەشکەرە یا سەروەریا هەرێما کوردستانێ و ئیراقێ یە.
دڤێ حکوومەتا فەدەرالا یا ئیراقێ و جڤاکا ناڤدەولەتی ل هەمبەری ڤان ئێرشێن ل دژی هەرێما کوردستانێ بێدەنگ نەمینە.
پێویستە نەتەوێن یەکبوویی، جڤاکا ناڤنەتەوەیی ل دژی رێڤەبەریا هۆڤا ئیرانێ کو هقووقا ناڤنەتەوەیی بنپێ دکە و جان و مال و ملکێن سڤیلێن بێگونەهـ، هەم ل وەلاتێ خوە و هەم ژی ل هەرێما کوردستانێ تەهدید دکە، دەنگێ خوە بلند بکن و دڤێ دەملدەست ڤان ئێرشێن هۆڤانە بدە راوەستاندن.
گه‌لێ کوردستانێ ل همبەری ئێرشێن تەرۆرییێن ئیرانێ دێ سەرێ خوە نەتەوینە.
