پاکستان ب مووشەکان بەرسڤا ئێریشێن ئیرانێ ددە

ئاژانسا “AFP” ل سەر زارێ ئاژانسێن ئیستخباراتا پاکستانێ راگھاند، ئارتێشا پاکستانێ چەند ئارمانج ل ناڤ ئاخا ئیرانێ بۆمبەباران کرنە.

بەرپرسێن ئیستخباراتا پاکستانی گۆتن، وان بارەگەھێن چەند کۆمێن چەکداریێن دژبەرێن پاکستانێ ل ھوندرێ ئیرانێ کرنە ئارمانج.

چاڤکانیێن پاکستانی دیار کرن، ئارتێشێ کامپێن “ئارتێشا رزگاریا بەلووچستانێ” ل ھوندرێ پارێزگەھا سیستان-بەلووچستانێ یا ئیرانێ کرنە ئارمانج.

تەکەز کرن ژی، حکوومەتا پاکستانێ دێ د دەمەک نێزیک دە داخویانیەکە فەرمی دەربارێ ئێرشا ل ناڤ ئاخا ئیرانێ دە بوەشینە.

ژ ئالیێ خوە ڤە، ئاژانسا فەرمی یا ئیرانێ (ئیرنا) ژ زارێ بەرپرسەکی پارێزگەھا سیستان-بەلووچستانێ راگھاند، ل گەلەک دەڤەرێن دەردۆرا باژارێ سەراوانێ دەنگێ تەقینان ھاتیە بھیستن.

جیگرێ پارێزگارێ سیستان-بەلووچستانێ عەلی رزا مەرحەماتی ژ ئاژانسا (ئیرنا) رە راگھاند، د ئەنجاما ئێریشا پاکستانێ دە، 3 ژن و 4 زارۆک کو وەلاتیێن ئیرانێ نە، ھاتنە کوشتن.

ئەڤ د دەمەکێ دەیە، سوپایا پاسدارێن ئیرانێ رۆژا 16 مژدارێ ئێرشی چەند چەپەرێن کۆمێن چەکدار ل ناڤا خاک پاکستانێ کربوو و د ئەنجامێ دە 2 زارۆک ھاتبوون کوشتن.

مەدیایا فەرمی راگھاندبوو، مووشەکێن ئیرانێ دو بنگەھێن کۆما چەکدارا “جەیش ئەل-عەدل” ل ھوندرێ پاکستانێ کرنە ئارمانج.