3 ژ کوژەرێن ھەر چار شەھیدێن ئێڤارا نەورۆزێ یا ل جندرێسا عەفرینێ، سزایێ دارڤەکرنێ ژ ئالیێ دادگەھەکە چەکداران ل وان ھاتە برین. مالباتا شەھیدان ژی ژ بریارێ نە رازییە.
ئێڤارا نەورۆزا 2023، گرووپەکە چەکدارێن ئەحرار ئەل-شەرقیەیێ ل باژارۆکێ جندرێسێ یێ سەر ب عەفرینێ ئێرشی مالباتا پێشمەرگەکی کربوو و ژ بەر کو وان ئاگرێ نەورۆزێ ل بەر مالا خوە ڤێخستبوو، چەکداران گولـلە ل وان رەشاندن و 4 کەس ژ مالباتێ شەھید کرن و زارۆکەک ژی بریندار بووبوو.
دادگەھا لەشکەری یا باژارۆکێ ئەل-راییێ ل گوندەوارێ حەلەبێ، سزایێ بدارڤەکرنێ ل سەر 3 ئەندامێن گرووپەکە سەر ب ئارتێشا نیشتمانی سەپاند، ژ بەر کوشتنا 4 وەلاتیێن کورد ل باژارۆکێ جندرێسێ د شەڤا نەورۆزێ دە.
دادگەھێ سزایێ بدارڤەکرنێ دا ھەر یەک ژ عۆمەر سالح ئەسمەر، حەبیب عەلی خەلەف، بیلال ئەحمەد عەبوود و سزایێ 3 سالان زیندان ژی دا ئەبوو حەبیب خەشام.
ژ ئالیێ خوە ڤە، مالباتا شەھیدان نەرازیبوونا خوە ژ بریارێ نیشان دان و گۆتن، کوژەرێ سەرەکەیێ وێ تاوانێ ئەبوو حەبیب خەشام، ژ ئالیێ دادگەھێ ڤە ژ سزایێ بدارڤەکرنێ خلاس بوویە و تەنێ سزایێ 3 سالان زیندان وەرگرتیە، ئەو ژی ڤێ بریارێ قەبوول ناکن.
مالباتا شەھیدان نەرازیبوونا خوە ب ریا ڤیدیۆیەکێ کو ل تۆرا جڤاکی وەشاند نیشان دا و ل سەر ڤێ یەکێ ژی بانگ ل سازیێن پێوەندیدار دکن و داخوازا دادپەروەریێ ژ بۆ کورێن خوەیێن د شەڤا نەورۆزێ دە ھاتین شەھیدکرن، دخوازن.
چالاکڤانێن عەفرینێ ژی ل تۆرێن جڤاکی ئەڤ دادگەھ ب “شانۆ” ب ناڤ کرن و گۆتن، دادگەھێ تاوانبارێ ب ناڤێ “حەسەن ئەل-دەب” یێ کو بەشداری کۆمکوژیا نەورۆزێ بوویە، تەڤی ھەبوونا دەلیلان ژی دوور خست.
چالاکڤان دبێژن، ت دەستھلاتەکا فەرمی ل ناڤچەیێن رۆژئاڤایێ کوردستانێ و باکورێ سووریێ یێن د دەستێ گرۆپێن چەکدارێن ئۆپۆزیسیۆنا سووریێ ڤە تونەیە کو بریارا سێدارەدانا تاوانباران ئیمەزە بکە. ژ بەر ڤێ ژی ئەڤ بریارە ناچە وارێ جبجیکرنێ.
شەھیدککرنا ھەر چار وەلاتیێن کورد، فەرخەدین عۆسمان (43 سالی)، محەمەد عۆسمان (42 سالی)، نەزمی محەمەد عۆسمان (38 سالی) و محەمەد فەرخەدین عۆسمان (18 سالی)، ل ناڤخوەیا عەفرینێ و وەلاتێن دەرڤە راستی کارڤەدانێن توند ھاتن و خوەپێشاندانێن نەرازیبوونێ یێن بەرفرەھ ھاتن کرن.
ل گۆری زانیاریان، دۆسیەیا شەھیدێن شەڤا نەورۆزێ ل جندرێسێ ل دادگەھا تاوانێن ناڤدەولەتی یا لاھایێ ژی ھاتیە ڤەکرن، پشتی کو زێدەتری 200 وەلاتیێن کورد ل دژی تاوانباران گلی کربوون.
