بەری 6 سالان، د 20 چلەیا 2018 دە ئارتێشا ترکیێ و گرۆپێن چەکدارێن سەر ب وێ ڤە، دەست ب ئێریشا ل سەر عەفرینێ کرن و پشتی شەرێ 58 رۆژان عەفرین و گوندەوارێ وێ داگیر کرن. د ئەنجاما داگیرکرنا عەفرینێ دە، زێدەتر ژ ھەزار وەلاتیێن کوردێن عەفرینێ شەھید و بریندار بوون، دۆرا 350 ھەزار وەلاتی ژی ب نەچاری دەربدەر بوون. پشتی 6 سالان ژ داگیرکرنێ ژی، ھینا بنپێکرنێن مرۆڤی، دزی و تالان، برین و ھلکرنا داران، دەستدانین سەر مال و ملکێن خەلک و گوھارتنا دیمۆگرافیا عەفرینێ بەردەوامە.
رۆژا 20/1/2018 ئارتێشا ترکیێ ب تۆپ و مووشەکان عەفرین و گوند و ناڤچەیێن وێ، راجۆ، شیێ، بلبلێ، شەرا، جندرێسێ، مابەتا و شێرەوا تۆپباران و بۆمبەباران کرن و گرۆپێن چەکدارێن ئۆپۆزیسیۆنا سووریێ ب فەرمانا ئارتێشا ترکیێ دەست ب ئێریشا بەژاھی ل سەر عەفرینێ کرن.
د ئێریشێ دە، مالێن سڤیلان، دبستان، ئاڤاھیێن فەرمی، نەخوەشخانە، مزگەفت، جھێن دیرۆکی و پیرۆز و ژێرخانا عەفرینێ ھاتن بۆمەبارانکرن و وێرانکرن.
ژ بەر ئێریشێ و ل گۆر ئامارێن ھاتنە راگھاند، زێدەتر ژ 300 وەلاتیێن عەفرینێ یێن سڤیل شەھید بوون و زێدەتر ژ 700 سڤیلان ژی بریندار بوون. ھەروھا دۆرا 350 ھەزار عەفرینی ژی ب نەچاری کۆچبەر و دەربدەر بوون،
بەشەک مەزن ژ وان ل گوندێن د ناڤبەرا عەفرین و حەلەبێ دە ھاتن بجھکرن و بەشەکێ ژی بەر خوە دان ھەرێمێن دن یێن کوردی و ھەرێما کوردستانێ.
پشتی شەرێ 58 رۆژان ئارتێشا ترکیێ و گرۆپێن چەکدارێن سەر ب وێ ڤە، د رۆژا 18 ئادارا 2018 دە دەرباسی باژارێ عەفرینێ بوون و داگیر کرن و دەست ب دزی و تالانا مال، ئاڤاھیێن فەرمی، دکان و سامانێن وەلاتیێن سڤیل کرن.
ژ رۆژا 18 ئادارێ ڤە، وەلاتیێن عەفرینێ د مەترسی و د بن گەفێ دە دژین. ب مەبەستا ستاندنا پەرەیان ژ مالباتێن عەفرینی ب ھەزاران خۆرت و کەچێن کورد ژ ئالیێ گرۆپێن چەکدار ڤە ھاتن و تێن رەڤاندن و راستی ئەشکەنجەیان تێن. ل گۆر ئامارێن چالاکڤانان، زێدەتر ژ 9 ھەزار وەلاتیێن عەفرینێ د ڤێ ھەیاما بووری دە ھاتنە رەڤاندن و تا نھا چارەنڤیسا زێدەتر ژ 2 ھەزار وەلاتیان نە دیارە.
ھەروھا ب ھەزاران عەرەبێن خووتایا شامێ، پارێزگەھا ئدلبێ و ناڤچەیێن جوداێن سووریێ ل عەفرینێ د مال و ملکێن کوردان دە تێن بجھکرن و دەمۆگرافیا عەفرینێ تێ گوھەرتن. ب سەدان ھەزار دارێن زەیتوونان ھاتنە دەستەسەرکرن و ب ھەزاران ژی دارێن زەیتوون و میوەیێن دن ھاتنە ھلکرن و قوتکرن.
ل گۆری زانیاریان، زێدەتر ژ کۆمەلگەھێن نشتەجھبوونێ ل باژارێ عەفرینێ و دەردۆرا وێ ھاتنە بەلاڤکرن و ئەڤ کۆمەلگەھ ب رێیا رێخستنا (ئافاد)یا ترکی و ب پشتەڤانیا دارایی یا قەتەر و کووەیتێ و رێخستنێن فلستینی ھاتنە ئاڤاکرن و مالباتێن چەکداران و عەرەبێن ناڤچەیێن دن یێن سووریێ ل وان کۆمەلگەھان تێن بجھکرن.
