ل ناڤچەیا قولپێ یا دیاربەکرێ رۆژا ئینێ دەما مەلایێ مزگەفتێ خوتبە دخوەند، قایمەقامێ کو وەک قەیوم ھاتیە دانان، خوتبە سەکناند و شەرێ مەلای کر، وی ئیدیعا کر کو، مەلا بەشەک ژ نڤیسا خوتبێ نەخوەند و سەر را دەرباس بوویە. قەیومی میکرۆفۆن ژ دەستێ مەلا دەرخست و پێ ل مەلا دایە. مەلا دچە نەخوەشخانەیێ راپۆرتەکی دگرە کو ھاتیە ئێشاندن و دەربارێ قەیومی دە دۆز ڤەکریە.
بارۆیا دیاربەکرێ ژی داخویانیەک راگھاند و گۆتن، ئەو دێ پێڤاژۆیێ بشۆپینن. والیێ دیاربەکرێ ل سەر ڤێ پرسێ لێکۆلینەکی دکە و قەیومی د ئێفادا خوە دە گۆتیە کو مەلا ژ خوتبێ بەشا کو دبێژە “ژ بۆ شەھیدێن مە نمێژا دلۆڤانیێ ھات کرن”، نەخوەند.
دەما قەیومی ئێریشێ مەلای کری، مەلا ژێرە دبێژە: وھا نەکە ئەز مەلامە، بابێ من ژی جەردەڤانە و برایێ من ژی پۆلیسە. نھا پێڤاژۆیا دادوەریێ د ڤێ دەربارێ دە بەردەوام دکە.
