کۆمارا کوردستانێ د رۆژا 22 چلەیا 1946 دە ل مەھابادێ ھات دامەزراندن و پێشەوا قازی محەمەد وەک سەرۆککۆمار سۆندا یاسایی خواربوو.
78 سال د سەر دامەزراندنا کۆمارا کوردستانێ رە دەرباس بوون و ئالیێن دەمۆکرات د وێ باوەریێ دە نە کو ھەر چقاس تەمەنێ کۆمارێ کن بوو ژی، خوەستەک و داخوازا گەلێ کورد بوو ژ بۆ دامەزراندنا دەولەتا کوردستانێ و بوویە سەدەما چێبوونا چەند ھێمایێن گرینگێن کورد، کو ھەتا نھا ژی ل ھەر چار پارچەیێن کوردستانێ، کورد ل سەر وان ھێمایان یەکن.
بەری 78 سالان، کۆمارا کوردستانێ ل مەھابادێ، ل قادا چارچرا ھات راگھاندن، کۆمارەک ب پێشەنگیا پێشەوا قازی محەمەد، کو ھەر وەکە د راگھاندنا یەکەم دە ھاتیە، ئارمانجا وێ، دامەزراندنا کۆمارەکا دەمۆکراتا کوردستانێ بوو.
کابینەیا کۆمارا کوردستانێ ب ڤی رەنگی بوو:
سەرۆک: قازی محەمەد
سەرۆکوەزیر: حاجی بابە شێخ
وەزیرێ شەر: سەیفی قازی
وەزیرێ ناڤخوە: محەمەد ئەمین موعینی
وەزیرێ ئابۆری: ئەحمەد ئیلاھی وەزیری
وەزیرێ پۆست و تەلەگراف: کەریم ئەحمەدیان
وەزیرێ چاند: مەناف کەریمی
وەزیرێ پرۆپاگاندا: سدیق حەیدەری
وەزیرێ کار: خەلیل خوسرەوی
وەزیرێ بازرگانی: حاجی مستەفا داوودی
وەزیرێ چاندنیێ: مەحموود وەلیزادە
وەزیرێ رێک و پران: ئیسماعیل ئیلخانیزادە
وەزیرێ تەندورستیێ: سەیید محەمەد ئەیووبیان
وەزیرێ دەولەتێ: عەبدولرەحمان ئیلخانیزادە
وەزیرێ دادێ: مەلا حوسێن مەجدی
پایتەخت: مەھاباد
دراڤ: ریالێ ئیرانێ
ھەر چقاس کۆمارا کوردستانێ، ل مەھابادێ ھات راگھاندن، لێ ژ ھێلا کوردستانیێن ھەر چار پارچەیێن کوردستانێ دھات پاراستن.
مەلا مستەفا بارزانی لگەل ھێزێن بارزان، ھێزێن سەرەکی یێن پارێزڤانێن ڤێ کۆمارێ بوون. پارێزڤانیەک وسا کو قازی محەمەد ئەوقاس پێ باوەر بوو، بەری سێدارەدانێ، ئالا کوردستانێ دابوو وی دەستێ ئەمین.
ھەر چقاس تەمەنێ کۆمارا کوردستانێ تەنێ 11 مەھ بوو، لێ دەستپێکەکا زەلال و ئەشکەرە بوو ژ بۆ سەرخوەبوونخوازێن کوردستانێ. لەورا پشتی کو یەکیتیا سۆڤیەتێ لگەل حکوومەتا وێ دەمێ یا ئیرانێ ل ھەڤ کر و د ناڤ بێدەنگیا زلھێزێن دن دە داوی لێ ئانی و پێشەنگێن کۆمارێ ھاتن دارڤەکرن، لێ پشتی 78 سالان، خەونا سەرخوەبوونێ ھەر مایە و ئیرادەیەکە بھێز دایە.
