پارتیا وەلاتپارێزێن کوردستانێ: کۆمارا کوردستانێ سەربلندییا ھەموو کوردستانییێن جیھانێ یە

پارتیا وەلاتپارێزێن کوردستانێ (PWK)ێ ب بۆنەیا 78ەمین سالڤەگەرا دامەزراندنا کۆمارا کوردستانێ داخویانیەک نڤیسکی بەلاڤ کر.

داخویانیا PWK وھایە:

کۆمارا کوردستانێ ب سەرۆککۆمارییا پێشەوا قازی محەمەد 78 سال بەرێ د رۆژا 22/1/1946، ل مەیدانا چارچرایێ یا باژارێ مەھابادا رۆژھلاتێ کوردستانێ ھاتە راگهاندن. وێ رۆژێ ل مەیدانا چارچرایێ نوونەرێن ژ ھەر چار پەرچەیێن کوردستانێ ئامادە بوون.

کۆمارا کوردستانێ د رۆژا 17/12/1946 دە ژ ئالیێ دەولەتا ئیرانێ ڤە ھاتە رووخاندن.

پێشەوا قازی محەمەد و 15 رێڤەبرێن کۆمارا کوردستانێ د رۆژا 31 ئادارا 1947 دە ل مەیدانا چارچرایێ ژ ئالییێ دەولەتا ئیرانێ ڤە ھاتن دارڤە کرن.

کۆمارا کوردستانێ د دیرۆکا کوردستانێ دە تەجرووبەیەکە گەلەک مەزن و گرینگە کو ھەموو کوردستانییێن جیھانێ پێ سەربلند بن.

ژیان، ھەلوەست ، شەخسییەت و واسییەت و پاراستننامەیا ل ماحکەمێ یا پێشەوا قازی محەمەد د ئەسلێ خوە دە رێباز و ھشمەندییا کوردستانی و ئارمانجا کۆمارا کوردستانێ پێشکێشی مە دکە.

بەلێ، پێکانینا وەسییەتا پێشەوا قازی محەمەد ھەروەھا رێ لێڤەکرنا ئازادییا ل ھەر چار پەرچەیێن کوردستانێ یە.

گاڤا کو ئەم ڤێ وەسییەتێ پێک بینن دێ روحێ پێشەوا قازی محەمەد، یێ مەلا مستەفا بارزانی یێ نەمر، یێ سەید رزا، ئیحسان نووری پاشا، خالد بەگێ جبری، شەخ سەعید و یێ ھەموو شەھیدێن کوردستانێ شاد بە.

د 78ەمین سالڤەگەرا راگهاندنا کۆمارا کوردستانێ دە، ئەم پێشەوا قازی محەمەد، پێشەوایێ لەشکەری یێ کۆمارا کوردستانێ مەلا مستافا بارزانی یێ نەمر و ھەموو دامەزرینەر و کەدکارێن کۆمارا کوردستانێ، شەھیدێن کۆمارا کوردستانێ و ھەموو شەھیدێن کوردستانێ ب رێزداری ب بیر تینن.

22/1/2024

نڤێسینگەها راگەھاندنێ یا پارتییا وەلاتپارێزێن کوردستانێ  (PWK)