کەچەکە خواندەڤان یا خەلکێ باژارێ کۆیەشت یا پارێزگەھا لۆرستانا رۆژھلاتێ کوردستانێ یا ب ناڤێ ئاناھیتا ئەمیرپوور ب گولەیێن راستەراست یێن ھێزێن ئیدارەیا ئیتلاعات (ئیستخباراتا ئیرانێ) ل باژارێ برووجێرد یا پارێزگەھا لۆرستانێ ھات کوشتن.
رێخستنا مافێ مرۆڤان یا ھەنگاو ڤێ دەربارێ دە راگەھاند، رۆژا 19/1/2024 ھێزێن ئیدارەیا ئیتلاعاتا ئیرانێ ل ناڤچەیا نیزامابادا باژارێ برووجێردا پارێزگەھا لۆرستانێ گولە ل ئۆتۆمۆبیلەکی بەردانە و ژ بەر وێ کەچەکا کورد یا تەمەن 20 سالی یا ب ناڤێ ئاناھیتا ئەمیرپوور کو خواندەڤانا دبستانا پەروەردەیا وەرزشێ یا زانینگەھا ئازادی یا برووجێرد بوو ژیانا خوە ژ دەست دا.
کەسەکی ب ناڤێ م. جەلالیفەرێ خەلکێ باژارێ برووجێرد شۆفێرێ وێ ئۆتۆمۆبیلێ بوویە و ئەو بخوە ژی خواندەڤانە و ب گرانی بریندار بوویە و نھا ل بەشا چاڤدێریا ھوور یا نەخوەشخانەیا شەھید چەمران یا باژارێ برووجێردێ یە.
ل گۆر ھەنگاو راگەھاندیە، پشتی ھێزێن ئیدارەیا ئیتلاعاتا ئیرانێ ئێریش کرنە سەر ئۆتۆمۆبیلا وان ھەردو خواندەڤانان، کو ئۆتۆمۆبیلێ راوەستینن و وان ژ ئۆتۆمۆبیلێ داخن، ژ بەر ئەو کەسێن جلووبەرگێنن سڤیل ل بەر وان بوونە شۆفێر ترسیایە و خوەستیە برەڤە، لێ ھێزێن ئیدارەیا ئیتلاعاتا ئیرانێ گولە ل وان بەردانە.
ناڤەندێن ئەولەھیا ئیرانێ دو رۆژێن بۆری دە گڤاش ل سەر مالباتێن وان و ھەڤالێن وان ھەردو خواندەڤانان کرنە کو نابە ت زانیاریەک ڤێ دەربارێ دە بێ بەلاڤ کرن، و دوھ ژی 21/1/2024 فەرمانبەرێن نەخوەشخانەیا شەھید چەمران یا برووجێرد ژ ئالیێ ئیدارەیا ئیتلاعاتێ ڤە ھاتنە گازی کرن و گەف ل وان ھاتیە خوارن.
ھێژایی گۆتنێیە، ناڤەندێن ئەولەھیا ئیرانێ یێن برووجێرد چ تشتەک ڤێ دەربارێ دە بەلاڤ نەکرنە، لێ قایمەقامێ وی باژاری موسلم مورادی د یەکەم داخویانیێ دە راگەھاندیە: “پشتی تەقینا کرمانێ و شەر و پەڤچوونێن ڤێ دەمێ ل سیستان و بەلووچیستانێ، ھەروەھا ژ بۆ تەکۆشین ل ھەمبەر دزیێ، د چەند رۆژێن بۆری دە ھێزێن لەشکەری و نزامی ب ئارمانجا کۆنترۆلان چاڤدێری و کۆنترۆلێ ل گەل ھەر تەڤگەرەکا نەیاسایی دکن، کو ئاساییشا ئیرانێ دخن مەترسیێ و د ئامادەباشیێ دە نە.”
ھەروەھا گۆتیە: “ھێزێن ئینتیزامی یێن باژارێ برووجێرد گومان ل ئۆتۆمۆبیلێ کرنە و پشتی فەرمانا راوەستانا ئۆتۆمۆبیلێ دانە، کو دو کەس تێدە بوونە، گرنگی ب ھشیاریێن بەردەوامێن ھێزا ئینتیزامی نەدانە و ھەولدانە برەڤن.”
قایمەقام مورادی داویێ دە ژی گۆتیە: “یەک ژ وان کەسان پشتی ڤەگوھەستنا نەخوەشخانەیێ ژیانا خوە ژ دەست دایە ویێ دن ژی د بن چاڤدێریا بژیشکی دەیە.” لێ چاڤکانیێن ھەنگاو وان گۆتنان رەد دکن و دبێژن ھێزێن ئیتلاعاتا ئیرانێ گولە ل وان دو کەسان بەردانە و ئاناھیتا ئەمیرپوور ژیانا خوە ژ دەست دایە.
