شەڤا 22 چلە د مالپەرا مەدیایێ یا ب ناڤێ شار پرێس دە نووچەیەک ب مانشێتێ “ھێزێن زێرەڤانی ژ بۆ ئێریشی پەکەکێ بکن کەتن حەرەکەتێ” ھات وەشاندن. ھندەک حەسابێن مەدیایا جڤاکی ژ بۆ نووچە زوو بەلاڤ ببە دەست ب ریکلام کرنێ کر.
پڕ خویایە کو ئەڤ نووچەیە ژ لایێ ناڤەندەکا نەیار ڤە ھاتیە دوورستکرن، ژ بەر کو دەما نووچە بەلاڤکرنێ بالکێش بوو ھێژ د سەر ئێریشێن ئیرانێ یێن ھەولێرێ رە تەنێ چەند رۆژ دەرباس ببوون. و نە دیارە کو دێ ھەتا کەنگی ئیران ھەلوەستا خوە یا ئێریشکار بدۆمینە. ل باژارێن کوردستانێ ھەم شین و ھەم ژی فکار ھەبوو. ھەمان دەم ھێرس و بەرخوەدانا گەل دەرباسی ناڤا شەقام و ناڤەندێن باژاران ببوو. ل ھەولێر، دوھۆک، زاخۆ، سۆران، ئاکرێ و بەردەشێ گەل ب ئاوایەکی جەماوەری داکەتن قادان. روحەکا مەزن یا یەکیتی و ھەڤگرتنێ دەرکەت پێش. د دەما کو گەلێ کورد ل بەندێ بوون کو ل ناڤچەیێن د بن ئیدارەیا یەنەکێ دە ب تایبەتی ل سلێمانیێ و باژارۆکێن دن ژی، ل دژی ڤێ سیاسەتا دژە کورد و قرکەر یا دەولەتا ئیرانێ ھەلوەستێ نیشان بدە، لێ مخابن بەرەڤاژی ڤێ ھێڤییا کوردان ل ناڤەندا سلێمانییێ ئەڤ نووچەیا “پێشمەرگە دێ ئێرشی پەکەکێ بکە” دەرکەت.
ھێزێن زێرەڤانی ل دژی ڤێ ئاژاوەگێریێ ھەلوەستەک زەلال نیشان دا
ھێزا زێرەڤانی سازیەکە کو ژ بلی مژارێن لەشکەری پڕ کێم داخویانیان ددە. لێ بەلێ ژ بەر کو ل پلانەکا ئاژاوەگێریێ حەسیان، داخویانی دان و دییار کرن، “نووچە و بەلگەیێن ئیرۆ ل سەر مەدیایا جڤاکی ھاتینە پارڤەکرن و دهێت ئیدتعاکرن کو لەشکەرێن د بن فەرمانداریا مە دە ل دژی پەکەکێ کەتنە حەرەکەتێ، دەرەون و ئەڤ نووچە ژ راستییێ دوورن.
فەرماندەیێ ھێزێن زێرەڤانی د بەردەوامیا داخویانیا خوە دە وھا گۆت: “ئەم د ڤێ دەما ھەستیار دە بەلاڤکرنا ڤان نووچەیێن دەرەو وەکە بەردەوامیا ئێریشا مووشەکی ژ ئالیێ دژمنان ڤە ل سەر ھەولێرێ دبینن.” ب ڤێ داخویانییێ فەرماندەیا زێرەڤانی، بال کشاند سەر خالا ھەری گرینگ.
ژێدەرا نووچەیێ، شار پرێس یا کێ یە؟
مەدیایا کو ئەڤ نووچەیا دەرەو بەلاڤ کری شار پرێس؛ یا کەسەکی ب ناڤێ کەمال رەئووفە. کەمال رەئووف بەرێ لگەل نۆشێروان مستەفا دا تەڤدگەریا. لێ پشترا ژ تەڤگەرا گۆران دەرکەت و لگەل یەنەکێ تێکلدار بوو. نھا ژی ل نێزیکی بافل تالەبانی دسەکنە و ژ ئالیێ یەنەکێ ڤە دهێتە تەمویلکرن. ئەڤ مالپەرا شار پرێس راستەراست ژ ئالیێ ھێزێن ئەنتی-تەرۆرێ یێن یەنەکێ و رێڤەبەرێن مەژیێ یەنەکێ ڤە تێ برێڤەبرن. دو رێڤەبەرێن گرینگێن یەنەکێ ھەنە کو باندۆرێ ل سەر شار پرێس دکن، یەک ژ وان فەرماندارێ ھێزێن ئەنتی تەرۆرا یەنەکێ وەھاب حەلەبچەیی یە و کەسێ دن ژی ئارێز عەبدوللاھە. ئارێز عەبدوللاھ ناڤەکی کێم ناسکری لێ سندۆقا رەشا یەنەکێ یە و دۆستەکێ جەمیل بایک یێ قەدیمە. پێوەندییێن د ناڤبەرا یەنەکێ و پەکەکێ دا ئارێز چێدکە و د مەشینە. لۆما ژی چاڤکانیا نووچەیێ و کەسێن ئەو چێکری نە نۆرمالن. ئەڤ نووچەیە ژ ئالییێ یەنەکێ و پەکەکێ ڤە ب زانابوون ھاتییە چێکرن و بەلاڤکرن. ئەڤ نووچە ل سەر بنگەھێ پلانکێ ھاتییە چێکرن دخوازن ئاژاوەیەکێ دروست بکن.
نووچە بەرھەمێ ئەقلییەتا ھەڤپار یا پەکەکێ و یەنەکێ یە
ئەڤ مالپەرە و نڤیسکارێن وێ یێن کو نووچە چێکرنە خوەدی ناسنامەیا یەنەکێ نە، لێ تلییا پەکەکێ ژی د ناڤ دەیە. ناڤەندا مەدیایا پەکەکێ ئەڤ نووچە وەکە بایێ برووسکێ وەردگێراندە سەر زمانێ ترکی و ل ھەمو مەدیایا خوە دە وەکە “نووچەیا لەزگین” بەلاڤ کر. واتە ئەڤ نووچە ژ بۆ بەرژەوەندیێن ھەڤپارێن یەنەکێ و پەکەکێ ھاتیە چێکرن. تشتا بالکێش ئەوە کو مەدیایێن ینەکێ و پەکەکێ ب ڤێ نووچەیا دەرەو خوەست راپەرینا کوردان یا ل دژی ئیرانێ ژ رۆژەڤێ بخن و ئێرشێن ل سەر ھەولێرا پایتەخت رەوا بکن. د ھەمان دەم دا راگەھاندنا ئیرانێ ژی وێنەیێن شەھید پێشرەو دزەیی یێن فۆتۆشۆپ کری بەلاڤ دکرن.
ئێریشا ئیرانێ یا ل سەر ھەولێرێ ب کێری یەنەکێ و پەکەکێ ھات، لێ ژ بەر کارڤەدانا گەلێ کورد نەکارین بگەھن ئارمانجا خوە.
میناک دەولەتا ئیراقێ ژی د ھەمان رۆژێ دە ئێریشا ئیرانێ شەرمەزار کر، لێ مخابن یەنەکێ پشتی رۆژەکێ داخویانیەک دا و شەرمەزار کر. پەکەکێ ژی پشتی 5 رۆژان داخویانی دا لێ شوونا ئیرانێ شەرمەزار بکە پەدەکە تاوانبار کر. پشترە ژی رێڤەبەر و مەدیایێن ھەر دو ئالیان ئەڤ نووچەیا دەرەو ژ بۆ رەواکرنا ئێرشێن ئیرانێ بەلاڤ کر. وەکە میناک رێڤەبەرێ یەنەکێ یێ ب ناڤێ فەرید ئەسەسەرد ژ بۆ دەنگێ ئامەریکا ئاخڤی و گۆت ئیران ڤالاڤالا ل جھەکێ ناخە، ب ئیحتیمالەکا مەزن ئیرانێ ئیستیخباراتا شاش وەرگرتیە و ژ بەر ڤێ یەکێ ژی لێ خستییە” واتە ئەڤ سەرکردەیێ یەنەکێ تۆھمەتێن ئیرانێ پشتراست دکە و دخوازە ئێرشێن ئیرانێ ل سەر ھەولێرێ رەوا بکە.
ژ ئالیەک دن ڤە مەدیایا پەکەکێ چ جاران دەست ژ دژمناتیا ھەرێما کوردستانێ بەرنەدا. بێی کو بەحسا ئیرانێ بکە، نووچەیێن کو سەرۆکوەزیرێ ھەرێما کوردستانێ دکە ئارمانج چێدکە.
لێ پلان وەکی کو وان دخوەستن نەمەشی. کۆمکوژیا ئیرانێ یا ل ھەولێرێ ل دژی خەلکێ سڤیل د ناڤا کوردان کارڤەدان ئاڤا کر. گەلێ کورد ئەڤ ئێرشا ئیرانێ وەکە ئێرشا ل سەر نەتەوا کورد و ئیرادەیا وێ دیت و ل دژی وێ ھەلوست گرتن. ھەلوەستا شەرمۆک یا رێڤەبەریا یەنەکێ ژی ژ ئالیێ گەل ڤە راستی کارڤەدانان ھات، لۆما ژی مەجبوور ما کو چاڤێن خوە ل بریارا خوەپێشاندانێن سلێمانییێ و ھەلەپچە بگرە. ل گۆری چاڤکانیێن ھەرێمی ھندەک رێڤەبەرێن وەکە ئارێز عەبدوللاھ ل دژی خوەپێشاندانا کو ل سلێمانیێ بهێت کرن دەرکەتییە. لێ بریار و ھەلوەستا گەل مەجال نەدایە ڤان بەرمایی یێن جەحشێن ئیرانێ.
رۆژەکێ بەرییا خوەپێشاندانا سلێمانییێ شار پرێس ئەڤ نووچەیا ئاژاوەگێر یا دەرەو بەلاڤکر.
گەلۆ ئارمانج چیە؟
د راستیێ دە، د نووچەیێ دە ئارمانجەکا ئاژاوەگێر دیارە، ئەو ژی گوھەرتنا رۆژەڤێ و بەلاڤەپیکرنا ھەستا یەکیتیا د ناڤا گەل دەیە. ئەو دخوازن ب دوبەندیێن سیاسی، ھەڤگرتنا گەل لاواز بکن و بەرتەکا ل دژی ئیرانێ بەلاڤ بکن و بسەکنینن. گەلێ باشوورێ کوردستانێ ئێرشا ئیرانێ وەکە دەست درێژی یا ل سەر نەتەوا کورد دیت. ئەو دەولەتا ئێرشی ژینایا 11 ھەیڤی بکە دێ سبەرۆژ ئێرشی ھەموو خەلکێ سڤیل و بێ گونەهێ کورد بکە. ھەلوەستا خەلکێ کورد؛ ھەولێر مالا مەیە، قبلەیا مەیە، پایتەختا مەیە و ھوون نکارن ئیرادەیا مە بشکینن ! ڤی جەوێ نەتەوپەروەر ھەموو دژبەرێن کورد عاجز کرن.
ل کوردستانێ لایەنەکێ ل گۆری بەرژەوەندییێن ئیرانێ یێن دژە کورد تەڤدگەرە ھەیە. ئەڤ ھێزە یەنەکە-پەکەکە-حەشدی شەعبی ب سپۆنسەرییا ئیرانێ دژین. ڤێ رەوشا ھەیی پلانسازییێن بھارێ یێن ڤان پێکھاتەیێن ئیرانێ ئالۆز کرن. ئارمانجا ڤان ھێزان ئەو بوو کو ل گەل وەرزێ بھارێ ئێرشێن ل سەر کوردستانێ زێدە بکن. لێ ھەلوەستا گەل ئەو نەیار خستنە ناڤا دودلی و فکاران دە.
باژارێ سلێمانییێ ئەڤە دەمەکێ درێژە بوویە ناڤەندا ھەڤپارا ڤان پێکھاتەیێن ئیرانێ. ل ور گەلەک چالاکیێن وەکە خوەپێشاندانا مامۆستایان، ئێریشێن ھەولێرێ، بێھێزکرنا سازییێن حکوومەتا ھەرێمێ، ساختەکاریێن مەدیایی و ھتد… تێن مەشاندن. واتە ل گۆری ھەڤپارکرنا ئەرک و کاری ئیراقێ دێ دۆرپێچا ئابۆری ل سەر ھەولێرێ بسەپینە، حەشدا شەعبی دێ ب درۆنا ئێرش بکە، پەکەکە ب ھنجەتا ترکان دێ شەری بکێشە ناڤا باژارێن باشوور، یەنەکە ژی د ناڤا حکوومەتا ھەرێمێ دە دێ تەنگاسییا ئاڤا بکە و ب سەرێ خوە ل گەل ئیراقێ پەیوەندییان دانە و ئێریشێن لەشکەری یێن ل دژی ھەولێرێ دێ بەر ب بھارێ ڤە زێدە ببن. ژ خوە پەکەکە ژ زوو ڤە ل ناڤەندا گارە-برادۆست ژ بۆ ئێرشی پێشمەرگێن کوردستانێ بکە خوە ئامادە دکە. لێ جەوێ ھەیی رێ نادە ڤێ ئێریشا پەکەکێ. ژ بۆ ڤێ یەکێ ژی باسکێ ب باندۆر د ناڤا یەنەکێ و پەکەکێ دە ھەول ددن ڤی جەوێ یەکیتییی و بەرگرییا گەل بەلاڤ بکن و ھەیڤا ئادارێ دە شەر و پەڤچوونان ل ھەرێمێ زێدە بکن.
پشتی بەرتەک و داخویانیا فەرمانداریا ھێزێن زێرەڤانی، شار پرێس نەچار ما ڤێ نووچەیێ ژێ ببە. لێ ئەڤە نە رەوشەکە کو مرۆڤ ب سڤکی پاشگوھ بکە. دڤێت ئەم ژ بیر نەکن کو گورگ حەز ژ ھەوایێ ب مژوموران دکە. لۆما ژی دڤێت پڕ هشییار بین. دێ بێی ناڤبەر ئاژاوەگێری و سەختەکاریێن ھێزێن د بن سپۆنسەرییا ئیرانێ دا نە، وەکە حەشدی شەعبی-پەکەکێ-یەنەکێ بەردەوام بکن.
