ل سلێمانیێ، حەلەبجە، سۆران و ئیدارەیا سەربخوە یا راپەرینێ ژ بۆ شەرمەزارکرنا ئێریشێن پاسدارێن ئیرانێ یێن ل سەر ھەولێرێ خوەپێشاندان و میتینگ ھاتن لدارخستن.
ب ھەزاران کەس ئیرۆ 23 چلەیا 2024 بەشداری خوەپێشاندانا بوون و ب بلندکرنا ئالا کوردستانێ و ئاڤێتنا سلۆگانان پشتگریا خوە ژ بۆ ھەولێرێ راگھاندن. خوەپێشاندەران ئێرشێن ئیرانێ یێن ل سەر ھەولێرێ و کوشتنا سڤیل و زارۆکان شەرمەزار کرن.
تەکەز کرن ژی، بۆمبەبارانکرنا مووشەکی، ئیرادەیا کوردان تێک نادە، ژ بەر کو د سەدسالا بۆری دە دژمنان گەلەک جورەیێن چەکان ل دژی گەلێ کورد بکار ئانینە، لێ ئەو چەک ھاتنە تێکبرن و کورد ھەر مانە.
د خوەپێشاندانێن سلێمانی، حەلەبجە و راپەرینێ دە ژی گۆتارێن ژ بۆ پشتگریا ھەولێرێ ھاتن خوەندن، ھات راگھاندن کو کوردستان یەک پارچەیە، ب ئێشا یەک پارچەیێ رە، پارچەیێن دن ژی ھەست ب وێ ئێشێ دکن.
شەڤا 15/1/2024 چەند دەڤەرێن سڤیلان ل ھەولێر و دەردۆرا وێ ب چەند مووشەکێن بالستی و درۆنان ھاتن ئارمانجکرن. د ئەنجاما ئێریشێ دە، 5 وەلاتی شەھید بوون و 6 وەلاتیێن دن ژی بریندار بوون کو پرانیا وان ئەندامێن مالباتا پێشرەو دزەیی بوون. پشترە ژی پاسدارێن ئیرانێ بەرپرسیاریا ئێریشان گرت سەر خوە.
ھەر د ڤێ دەربارێ دە، شێورمەندێ ئاسایشا نشتمانی یا ئیراقێ و سەرۆکێ کۆمیتەیا لێکۆلینێ یا حکوومەتا ئیراقێ قاسم ئەل-ئەعرەجی دەربارێ ئێرشێن ئیرانێ ل سەر ھەولێرێ راگھاندبوو، جھێ ھاتیە ئارمانجکرن مالا سڤیلەکی بوو و نە بنکەیەکە سیخوری یا ئیسرایلێ بوو.
