روفاتێن 41 كوردێن ئێزدی یێن كو د ب ده‌ستێ ته‌رۆریستێن داعشێ ل سالا 2014ێ هاتبوون كۆم كوژ كرن، ئیرۆ بۆ شه‌نگالێ هاتن ڤه‌گه‌راندن و د مه‌راسیمه‌كه هێژا ده سپارتن ئاخێ.
ئیرۆ رۆژا چارشه‌می 24\1\2024ێ، روفاتێن 41 كوردێن ئێزدی یێن قوربانیێن ده‌ستێ ته‌رۆرا داعشێ بۆ شه‌نگالێ هاتن ڤه‌گه‌راندن و مه‌راسیمه‌كه هێژا ژ بۆی پیشوازیكرنێ ل وان روفاتان هات ل دارخستن.
ده‌ستپكێ روفات ژ بۆ مونیۆمێنتا شه‌هیدێن كوردێن ئێزدی هاتن برن، پاش كو مه‌راسیم ب داوی دبه وێ ل چار گۆرستانێن جودا وێ ب ئاخێ وه‌رن سپارتن.
هات راگهاندن كو رۆژێن 24، 25 و 26 ڤێ مه‌هێ شێنی ژ بۆی وان تێ دانین.
هێژای گۆتنێ یه، ئه‌ڤ روفات یێن گوندێن حه‌ردان، كۆچۆ، كۆمه‌لگه‌ها خانه‌سۆرێ و گوندێ قنێ نه، ئه‌ڤ ژی دبن شه‌شه‌مین كاروانێ روفاتێن كوردێن ئێزدی كو ژ بۆی شه‌نگالێ تێن شاندن كو ژ 188 روفاتان پێك تێن.
ئۆفیسا رزگاركرنا ره‌ڤاندیێن ئێزدی ژی ئاشكه‌ره كریه كو هه‌یا رۆژا مه یا ئیرۆ 92 گۆرێن ب كۆم یێن ئێزدیان هاتنه دیتن، 55 ژێ هاتنه كۆلاندن و 242 روفات تێ ده بوونه.
