ئیرۆ رۆژا چارشه‌می 24\1\2024ێ، روفاتێن 41 كوردێن ئێزدی یێن قوربانیێن ده‌ستێ ته‌رۆرا داعشێ بۆ شه‌نگالێ هاتن ڤه‌گه‌راندن و مه‌راسیمه‌ك ژ بۆی پێشوازیكرن و سپارتنە ئاخێ یا وان روفاتان هات ل دارخستن.
جەنازەیێن 41 شەهیدێن بێ گونەهـ یێن ئێزدی کو ب شێوەیەک هۆڤانە ژ ئالیێ داعشێ ڤە هاتبوون شەهیدکرن و د ناڤا وان دە جەنازەیێ کەساتیی بەرنیاس یێ شەنگالێ و گوندێ کۆچۆ سەعید جەزاع “باڤێ نووری” ژی هەبوو ژ بۆی شەنگالێ هاتن ڤەگەراندن و د رێورەسمەک ژ هەژی دە ب ئاخێ هاتن سپارتن، ڤێ یەکێ جارەکە دن فەرمانا 74 یا ل سەر ئێزدیان ل بیرا وان ئانی و ئەو پڕ پێ عاجز بوون، لێ تشتا ئێزدیان پێتر عاجز دکە تشتەک دنە، ئەو ژی ئەڤە کو د بن دەستهلاتا پەکەکێ دە کەڤنە داعش و مالباتێن وان د ژیانەکە ئارام دە دژین.
بەلێ، تشتا کو نە ب تەنێ ئیزدیان بەلکو تەڤ گەلێ کورد دئێشینە و عاجز دکە ئەڤە کو د بن سەیوانا پەکەکێ دە ئەنجامدەرێن فەرمانا 74 یا ل سەر ئێزدیان ل شەنگالێ و مالباتێن وان د ئازادن و هەر مافەک هەیە، نە ب تەنێ ئەڤ، بەلکو پاسەوانیا وان تێ کرن، بەرپرساتی ژێ رە تێ دایین و تێن وەزیفەدارکرن.
د بن سەیوانا پەکەکێ دە عەرەبێن دوهـ ئێزدی کۆمکوژ کرین نها جارەکە دن ل شەنگالێ تێن ب جی کرن، چەکدارێن عەرەب یێن بەرێ د ناڤا رەفێن داعشێ دە بوون نها د ناڤا رەفێن پەکەکێ دە وەک چەکدارێن یەبەشێ هاتنە وەزیفەدارکرن و ئەڤ بکوژ نها پێشوازیێ ل جەنازەیێن وان ئێزدیان دکن یێن کو وان ب خوە ب دەستێ خوە کۆمکوژ کرین.
هەژمارا کەسێن عەرەب یێن بەرێ د ناڤا داعشێ دە بوون و ئێریشێ ئێزدیان کری و نها ژی د ناڤا رەفێن یەبەشی دە نە، نە هندکن، میناک پڕ زێدەنە، وەکە عەسکەر یونس حەمید معێلی کو د ناڤا یەبەشێ دە ب “فەدائی عەسکەر” تێ ناسکرن و ژ هۆزا مەوالی یە، ژ شێنیێن گوندێ “چاییر غلفس” یێ سەر ب بەعاجێ یە و نها مالا وی ل گوندێ “ئوم زبیانە” و یەک ژ چەکدارێن یەبەشێ یە.
چەکداربوونا فەدائی عەسکەر د ناڤا یەبەشێ دە د دەمەکی دە یە کو بابێ وی یەک ژ بەرپرسێن داعشێ بوو ل ئەنیا بەعاج و یەک ژ سەرپەرشتێن داعشێ یێن داگیرکرنا شەنگالێ ل رۆژا 3/8/2014 بوو، پاش کۆمکوژیا گوندێ کۆچۆ بابێ وی دو کەچێن ئێزدی وەکە جاریە ژ خوە رە برن و د ناڤا مالا خوە دە ب سەدان جاران دەستدرێژی ل سەر وان کەچێن ئێزدی کر.
پاش کو هێزێن عیراقی بەعاج ژ دەستێ داعشێ ئازاد کری بابێ “فەدائی” ب هەر دو کەچێن ئێزدی و هەڤژینا خوە ڤە دەرباسی سووریێ دبن و ل سالا 2020 ژ ئالیێ هێزێن هەسەدێ ڤە تێ دەستەسەرکرن و نها ژی د زندانێ دە یە، هەر وەها فەرمانا دەستەسەرکرنا تەرۆریست بابێ عەسکەر د سالا 2016 دە ل دادگەها نەینەوایێ هاتیە دەرکرن.
بەلێ، د ناڤا رەفێن یەبەشێ دە ل شەنگالێ داعش ژی هەنە و نها د بن سەیوانا پەکەکێ دە د ژیانەکا پڕ ئارام و ئەولە دە دژین و حوکمی ل ئێزدیێن بەلەنگاز دکن.
